Республика Хөкүмәте Йортында узган очрашуда төбәк, федераль һәм чит ил фәнни берләшмәләр, шул исәптән Үзбәкстан, Казахстан, Кыргызстан, Беларусь һәм башка илләрдән вәкилләр катнашты. Бу хакта Республика Рәисенең матбугат хезмәте хәбәр итә.
Рөстәм Миңнеханов билгеләп үткәнчә, Татарстан Фәннәр академиясе төбәк фәнни-технологик үсешенә дәүләт идарәсе моделендә төп звено булып тора. Кыска гына вакыт эчендә ул республика фәнни-техник сәясәтен эшләү һәм гамәлгә ашыру өчен җаваплылык үзәге репутациясен яулады, диде ул.
Уздырыла торган эшләр нәтиҗәсендә республика югары уку йортлары бүген «Приоритет-2030» стратегик академик лидерлык программасында киң тәкъдим ителде. Алар базасында алдынгы инженерлык мәктәпләре эшли, шуның хисабына белем бирү мохите яңа кадрлар белән тулылана.
"Соңгы елларда Академия галимнәргә дәүләт ярдәменең гамәлдәге механизмнарын камилләштерүдә һәм яңаларын кертүдә сизелерлек алга китешкә иреште. Алар арасында: төбәк дәрәҗәсендәге инженерлык мәктәпләре төзү проектлары, фундаменталь һәм гамәли эшләр конкурсы, яшь галимнәрнең торак шартларын яхшырту буенча уникаль программалар», - дип сөйләде Татарстан Рәисе.
Республика тикшеренүләрне һәм эшләнмәләрне алгарышлы темплар белән финанслый – соңгы 5 елда финанслау күләме өч тапкырга арткан. Фәнни хезмәткәрләр саны 17 мең кешегә җиткән – бу соңгы елларда рекордлы күрсәткеч.
«Безнең академиянең бай тарихи мирасны, күп милләтле Татарстанның уникаль мәдәни кодын саклауга, шулай ук республикада милләтара һәм конфессияара тынычлыкны һәм татулыкны ныгытуга керткән өлешен аерым ассызыклыйсым килә», - диде Рөстәм Миңнеханов.
Республика Рәисе ил җитәкчелеге тарафыннан фәнни-техник өлкәдә зур бурычлар куелуына игътибар итте. Ул республиканың галимнәре һәм фәнни оешмалары аларны гамәлгә ашыруда актив катнашачагына ышаныч белдерде.
Татарстан Фәннәр академиясе президенты Рифкать Миңнеханов хәбәр иткәнчә, уртак тырышлык белән бүген фән үсә һәм халыкара фәнни элемтәләр ныгый. Ул билгеләп үткәнчә, хәзер галимнәр көн саен фән һәм мәгариф, техника һәм инновацион технологияләр өлкәсендәге өстенлекле бурычларны хәл итәләр.
Россия Хөкүмәте Рәисе урынбасары секретариаты җитәкчесе урынбасары Антоний Швиндт илнең вице-премьеры Дмитрий Чернышенконың котлау сүзләрен җиткерде. Ул мәктәпләрдә юнәлеш сыйныфлары булдыру, урта һөнәри белем бирү системасын үстерү, яшьләр лабораторияләре проектларын гамәлгә ашыру өлкәсендә эшнең әһәмиятен аерым билгеләп үтте. "Татарстанның лидерлык позициясе - соңгы гасырларда биредә уздырыла торган бөек тикшеренүләрнең дәвамы", - дип өстәде Антоний Швиндт.
Әңгәмә барышында шулай ук химия, физика, инновацион технологияләр, шулай ук социаль һәм гуманитар юнәлешләрдә республиканың фәнни җәмәгатьчелегенең казанышлары билгеләп үтелде. Галимнәрнең комплекслы әзерлегенә югары бәя бирелде. Татарстан тикшеренүчеләренең тәҗрибәсен ил төбәкләрендә һәм чит илләрдә тарату буенча тәкъдимнәр яңгырады.
Очрашу азагында Рөстәм Миңнеханов берничә дәүләт бүләкләре тапшырды.
БЕЗНЕҢ МАКС КАНАЛЫНА ЯЗЫЛЫГЫЗ!
Фикер өстәү
Фикерегез