Чарада Татарстан Рәисе Рөстәм Миңнеханов, ТР Дәүләт Киңәшчесе Минтимер Шәймиев, ТР Дәүләт Советы Рәисе Фәрит Мөхәммәтшин, министрлык-ведомство җитәкчеләре, район-шәһәр башлыклары, хәрбиләр катнаша. Бу турыда Татар-информ яза.
Алып баручылар Татарстанда 2026 ел Хәрби һәм хезмәт батырлыгы елы булуын искәртте. «Һәркем бер йодрык булып җиңү өчен көрәшә. Кемдер алгы сызыкта, кемдер тылда эшли, кемдер сүз һәм гамәле белән булыша», - диделәр.
Сәхнә уртасына Россия Федерациясе һәм Татарстанның дәүләт флаглары чыгарылды. Россия һәм Татарстанның дәүләт гимннары яңгырады. Аннары Татарстан Рәисе Рөстәм Миңнеханов чыгыш ясады.
«Бу бәйрәм - халкыбызның хәрби батырлыгына, ил иминлеген яклаучыларга хөрмәт белдерү көне», - дип мөрәҗәгать итте Татарстан Рәисе.
Ул бер ел элек шушы стеналарда Ватанны саклаучы елы игълан ителгәнен искәртте. Рөстәм Миңнеханов әйтүенчә, ел тәмамланса да, кайгыртучанлык беркайчан бетмәячәк.
«Саклаучы ул - кулына корал тотып йөрүче генә түгел, ә иле, гаиләсе сагында торучы», - дип ассызыклады Татарстан Рәисе.
Хәзерге минутларда Рөстәм Миңнеханов Ватанны саклау һәм патриотик тәрбия эшендә зур өлеш керткәннәргә дәүләт бүләкләрен тапшыра.
Гөлнар Гарифуллина
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез