Татарстан Рәисе Россия делегациясе составында зур халыкара форумда катнашты

Форумда дөньяның төрле илләреннән югары дәрәҗәдәге делегацияләр катнаша. Россия делегациясен Россия Президенты Владимир Путин җитәкли.

Пленар утырышта Россия Президенты Төрекмәнстанның дустанә халкын истәлекле юбилей датасы белән котлады. «30 ел элек сезнең ил җитәкчелеге тарафыннан даими нейтралитет файдасына сайлау, асылда, Төрекмәнстанның бәйсез һәм суверен дәүләт буларак үсешенең стратегик векторын билгеләде. Үзәк Азия төбәгендә дә, бөтен дөньяда да абруй казанган дәүләт», – диде ул.

Владимир Путин ассызыклаганча, бай тарихи, мәдәни һәм рухи мираска таянып, Төрекмәнстан халык хуҗалыгының һәм социаль өлкәнең төрле тармакларында алга китешкә ирешә. «Сезнең илегез акыллы тышкы сәяси курс үткәрә, төбәк һәм халыкара иминлекне һәм тотрыклылыкны ныгытуга зур өлеш кертә, дөнья эшләрендә хезмәттәшлек һәм үзара ышаныч атмосферасын формалаштыру өчен җитди көч куя», – дип билгеләп үтте Дәүләт Башлыгы.

Ул аерым билгеләп үткәнчә, Россия белән Төрекмәнстанның стратегик партнерлыгы дуслык һәм күршелек рухында уңышлы үсә. Ике яклы икътисадый элемтәләр киңәя. 2025 елның 10 аенда товар әйләнеше инде 35%ка арткан, бу алдагы ел белән чагыштырганда сизелерлек күбрәк. Россия компанияләре Төрекмәнстан базарында яңа инвестиция проектларын тормышка ашырырга әзер, энергетика, транспорт, башка тармакларда хезмәттәшлек ныгый бара. 

Россия һәм Төрекмәнстанның актив катнашында колачлы күп яклы икътисадый инициативалар гамәлгә ашырыла, шул исәптән Каспийда һәм Үзәк Азиядә, «Төньяк –Көньяк» магистраль транспорт коридоры салына. 

«Ике яклы төбәкара багланышлар да үсә, мәдәни-гуманитар һәм мәгариф өлкәләрендә алмашулар арта. Россиядә 54 меңнән артык Төрекмәнстан студенты белем алуын әйтү дә җитә», – диде Владимир Путин. 

Ул Төрекмәнстан хезмәттәшләренә уңышлар теләде һәм Россия ягы барлык кирәкле ярдәмне күрсәтәчәк, дип ышандырды.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!