Татарстан Республикасында 2025 елның 29 ноябренә файдалануга торак тапшыру планы 97%ка үтәлгән, 3 млн 156 мең кв.м. торак файдалануга тапшырылган. Мондый мәгълүматларны бүген ТР Хөкүмәте Йортында узган республика киңәшмәсендә ТР төзелеш, архитектура һәм ТКХ министры Марат Айзатуллин китерде.
Киңәшмәне Татарстан Рәисе Рөстәм Миңнеханов уздырды. Киңәшмәдә ТР Премьер-министры Алексей Песошин, ТР Дәүләт Советы Рәисе Фәрит Мөхәммәтшин катнашты.
Татарстан Республикасы Төзелеш министрлыгы башлыгы хәбәр иткәнчә, коммерциячел төзелеш линиясе буенча планлаштырылган күләмнең 42%ы тапшырылган – бу гомуми мәйданы 707 мең кв. м булган 89 күп фатирлы йорт.
Социаль ипотека программасы буенча еллык план 93%ка үтәлгән. Планда каралган 35 йортның 20се әзер, аларның мәйданы 150 мең кв. метрдан артык.
Шәхси торак төзелешенә килгәндә исә, бүгенгә мәйданы 2 млн 298 мең кв. метрдан артык булган 17 024 йорт тапшырылган.
Марат Айзатуллин гражданнарның аерым категорияләрен торак белән тәэмин итү программаларының гамәлгә ашырылуы турында сөйләде. Ятим балалар өчен билгеләнгән 450 торак урынның 443ен сатып алу буенча биш дәүләт контракты төзелгән. Калган 7 торак буенча дәүләт контрактын төзү быелның 8 декабренә кадәр планлаштырылган.
«Яшь гаилә» категориясен алучы 69 кешенең 67се субсидия алганнар. Тагын 2 гаилә иң кулай торак вариантларын сайлый.
Күп балалы гаиләләр категориясендә быел 27 торак алучы исәпләнә. Шулардан 2 247 кв. м мәйданга 26 сертификат реализацияләнгән инде.
Торак төзелешенә ярдәм итүгә ике программа юнәлдерелгән. «Күп балалы гаиләләр өчен җир кишәрлекләрен төзекләндерү» республика программасы буенча (юллар һәм су белән тәэмин итү челтәрләре төзү) программаның соңгы объекты эшләнеп бетмәгән. Үтәлеш 92% тәшкил итә.
Аннары министр социаль-мәдәни объектлар төзү буенча федераль һәм республика программаларын гамәлгә ашыру турында сөйләде. Быел гамәлгә ашырыла торган 14 социаль-мәдәни объект программасының 9ы төгәлләнгән. Мәгариф, медицина, спорт, мәдәният учреждениеләре, яшьләр үзәкләре, шулай ук балаларны савыктыру лагерьлары төзүне үз эченә алган 5 программа буенча эшләр дәвам итә.
Мәгариф өлкәсендәге 13 объектның 8е - гомуми белем бирү мәктәпләре. Төзелеш-монтаж эшләре «Авыл территорияләрен комплекслы үстерү» дәүләт программасы кысаларында Әгерҗе, Буа һәм Минзәлә шәһәрләрендә өч былтырдан калган объектта дәвам итә. Объектлар буенча гомуми үтәлеш 22%, 42% һәм 46% тәшкил итә.
Питрәч һәм Зеленодольск районнарында ике мәктәпкәчә мәгариф объекты төзелеше дәвам итә (2026 елга күчәчәкләр). Алар буенча үтәлеш - 44% һәм 53%. Хисап чорында Казанда бер объект төгәлләнгән.
Агымдагы елда төзелә торган 53 сәламәтлек саклау объектыннан «Авыл территорияләрен комплекслы үстерү» дәүләт программасы кысаларында гамәлгә ашырыла торган Байлар Сабасы штп бер медицина учреждениесе эшләнеп бетмәгән. Аның буенча үтәлеш 74% дип бәяләнә.
ТР Яшьләр эшләре министрлыгы белән берлектә гамәлгә ашырыла торган 3 программаның икесе республика программасы буенча эшләр алып барыла. Бу яшьләр үзәкләре төзелеше, Арча районында бер объект төгәлләнеп бетмәгән. Аның буенча үтәлеш 76% тәшкил итә. Шулай ук балаларны савыктыру лагерьлары да төзелә. Программага кертелгән 8 объектның берсен Лаеш районында тәмамлыйсы кала. Аның буенча 50% үтәлгән.
ТР Спорт министрлыгы линиясе буенча программага кергән 23 спорт корылмасының иң зур объектын – Футболны үстерү үзәген төзеп бетерәсе кала. Бүгенгә аның әзерлеге 53% тәшкил итә.
Мәдәният өлкәсендә дүрт объект гамәлгә ашырыла. Алар барысы да «Авыл территорияләрен комплекслы үстерү» дәүләт программасына кертелгән. Төзелеш-монтаж эшләре 2026 елга күчүче ике күп функцияле үзәктә Әгерҗедә һәм Буада дәвам итә. Алар буенча үтәлеш 41 һәм 50% тәшкил итә.
Эре экологик проектны – Казанда ләм кырларын рекультивацияләүне («Экологик иминлек» илкүлә проекты) гамәлгә ашыру дәвам итә. Объект 93%ка әзер.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез