Татарстанда 58 яшендә элекке хакимият башлыгы вафат булган

Әгерҗе районының элекке хакимияте башлыгы Валерий Макаров 59нчы яшендә вафат булган. Бу хакта районның бүгенге хакимияте башлыгы Ленар Нургаянов үзенең телеграм-каналында хәбәр иткән, дип яза “Татар-информ”.

“Аңа 58 яшь иде. Гомеренең соңгы көннәренә кадәр, гаять зур ныклык күрсәтеп, чиргә каршы көрәште. Кызганычка, чир көчлерәк булып чыкты”, – дип язган элекке җитәкченең үлеме сәбәбен әйтмичә генә хакимият башлыгы.

Нургаянов билгеләп үткәнчә, Макаров Әгерҗе районын үстерү өчен бик күп эшләгән. “Территорияләрне төзекләндерү, кешеләрнең яшәү шартларын яхшырту, торак-коммуналь хуҗалык объектларын тотрыклы эшләтү өчен бик зур тырышлык куйды”, – дигән бүгенге хакимият башлыгы.

Безнең белешмә: Валерий Владимирович Макаров 1965 елның 16 февралендә Зәйдә туган. Озак вакытлар буе Чаллы шәһәренең төрле предприятиеләрендә эшләгән. 2012 елда башта – Әгерҗе районы башкарма комитеты җитәкчесе урынбасары, соңрак – җитәкчесе итеп билгеләнгән. 2013 елдан 2020 елга кадәр Әгерҗе районын җитәкләгән.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!