Республикада 14 марттан гадәттәге авыл хуҗалыгы ярминкәләре эшли башлады, алар Казан шәһәрендә 14 мәйданчыкта, Чаллыда һәм Зеленодольск районында 2шәр мәйданчыкта, Түбән Камада 3 мәйданчыкта һәм муниципаль районнарда төрле даимилектә уза.
Авыл хуҗалыгы ярминкәләре Татарстанда күркәм традициягә әверелде һәм алар, җитештерүчеләр һәм кулланучылар арасында элемтәне тәэмин итеп, авыл хуҗалыгын үстерүгә һәм төбәкнең азык-төлек иминлеген яхшыртуга ярдәм итеп, даими рәвештә уздырыла, бу «Нәтиҗәле һәм конкурентлы икътисад» илкүләм проекты максатларына һәм бурычларына туры килә.
Узган шимбәдә Казандагы ярминкә мәйданчыкларында Татарстан Республикасы авыл хуҗалыгы министрының беренче урынбасары Ленар Гарипов булды. Ул «Казан» агросәнәгать паркының ярминкә мәйданчыкларын йөреп чыкты, продукциянең төрлелеген бәяләде, сатып алучылар һәм сатучылар белән аралашты.
Шәһәрлеләр ит, казылык продукциясен, үлчәүле сөт, сыр, май, йомырка, яшелчәләр, бал, шикәр, он, ярмаларны һәм Татарстан муниципаль районнарыннан китерелгән башка фермер продукциясен арзанрак бәяләрдән сатып ала алдылар.
Беренче ярминкә атнасы йомгаклары буенча республика районнарыннан 89,8 млн.сумлык авыл хуҗалыгы продукциясе китерелгән; шулардан: 100,4 тонна яшелчә, шул исәптән 51,3 тонна бәрәңге; 18,9 тонна үлчәүле сөт; 28,7 тонна шикәр; 177,3 мең данә тавык йомыркасы; 98,6 тонна ит ( шул исәптән 48,7 тонна сыер ите). Ярминкәләр уздыру өчен 877 транспорт берәмлеге җәлеп ителгән.
Язгы авыл хуҗалыгы ярминкәләре 26 апрельгә кадәр дәвам итәчәк.
Сүз уңаеннан, хәзерге вакытта Татарстанда «Технологик яктан азык-төлек куркынычсызлыгын тәэмин итү» илкүләм проекты гамәлгә ашырыла.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез