Татарстанда язгы чәчүне 1,7 млн га мәйданда башкарырга планнаштыралар

Язгы кыр эшләренә әзерлек турында Татарстан Республикасы Хөкүмәте Йортында узган киңәшмәдә республика авыл хуҗалыгы һәм азык-төлек министрының беренче урынбасары Ленар Гарипов сөйләде. Киңәшмәне Татарстан Рәисе Рөстәм Миңнеханов үткәрде. Анда ТР Дәүләт Советы Рәисе вазыйфаларын башкаручы Марат Әхмәтов катнашты.

Бу атнада тугыз район хуҗалыклары басуларга ашлама кертергә кереште. Бүгенге көнгә 1323 га уҗым культуралары һәм 595 га күпьеллык үләннәр тукландырылган. Бердәм старт алу һәм уңдырышлылык потенциалын саклап калу өчен 485 мең га уҗым культураларын һәм 309 мең га күпьеллык үләннәрне тукландырырга кирәк булачак. Атналык темплар 40 мең га булганда, моңа 20 көн сарыф ителә.

Быелгы уңыш өчен 395 мең тонна минераль ашлама сатып алынган. Уртача алганда, бер гектар чәчүлеккә 67,7 кг тәэсир итүче матдә туры килә. Соңгы 2 атнада өстәмә рәвештә 49 мең тонна ашлама сатып алынган - бер гектарга 6 килограммнан артык.

Бөртекле сабан культуралары белән тәэмин ителеш 128% тәшкил итә. "Россельхозцентр" филиалы тарафыннан чәчүлек сыйфатлары өчен 250 мең га яисә 100%тан артык бөртеклеләр тикшерелгән. 2 атна эчендә үсеш - плюс 8%. Сатып алынган орлыкларның тиешле күләменнән 91% кукуруз, 91% көнбагыш һәм 100% шикәр чөгендере контрактлаштырылган.  Орлык ташу график буенча бара.

Сабан культуралары 1,7 млн га мәйданда чәчәргә кирәк. 23-27 март көннәрендә районнарда Татарстан Республикасы Дәүләт техника күзәтчелеге һәм Россельхозцентр хезмәтләре белән берлектә авыл хуҗалыгы оешмаларының язгы кыр эшләренә комплекслы әзерлеген тикшерделәр. Актаныш, Арча, Әтнә, Балтач, Буа, Чүпрәле, Зәй, Кукмара, Лениногорск, Тукай районнары хуҗалыклары югары әзерлек күрсәттеләр.

Сезонлы эшләрне башкарганда төп ресурс - кадрлар. Хуҗалыклар урта һәм югары уку йортлары белән актив хезмәттәшлек итә. Эшче куллар җитешмәгәндә, өлкән курс студентлары чакырыла. Аларга яшәү, туклану һәм хезмәт хакы тәэмин ителә. Республиканың урта махсус һәм югары аграр уку йортларында 6,6 меңнән артык студент белем ала. Хәзерге вакытка якынча 1,7 мең студент кыр эшләре чорында практикага әзер, шуларның 1 меңнән артыгы хуҗалыкларга беркетелгән инде. Ленар Гарипов искәрткәнчә, АСК предприятиеләренә хезмәт һәм яшәү өчен түләүгә бәйле тотылган чыгымнарны каплау каралганның: 90% ы - аграр юнәлештәге югары уку йортлары студентлары өчен, 30% ы - урта махсус уку йортлары студентлары өчен.

/ТР Рәисе Матбугат хезмәте

БЕЗНЕҢ МАКС КАНАЛЫНА ЯЗЫЛЫГЫЗ!