12 ноябрь 2025 Яңалыклар

Татарстанда «отышлы бәядән» фатир алырга ярдәм итүче хатын 360 миллион сум урлаган

Чаллы шәһәре суды 46 яшьлек Альбина Гладкованы 167 мошенниклык очрагы буенча гаепле дип таныган. Хатын-кыз Җинаять кодексының 159 статьясындагы 2-4 өлешләре буенча хөкем ителгән, дип яза “KazanFirst”.

Җинаять эше материалларына караганда, Гладкова 2018 елның маеннан 2020 елның мартына кадәрге чорда “отышлы бәядән” фатир сату һәм сатып алу буенча ярдәмен тәкъдим иткән, шулай ук “процент бирү” хисабына акчалар кабул иткән. Шушы вакыт эчендә Чаллыда яшәүче 190 кешедән барлыгы 360 миллион сумнан артыграк акча урлаган.

Аферист, акчаны кире кайтару яки күчемсез милек белән алыш-биреш ясауны вәгъдә итеп, кемнәрнеңдер акчасын кесәсенә салып куйган.
Суд аны 10 елга ирегеннән мәхрүм иткән. Мошенник гомуми режимдагы төрмәдә утырачак. Хөкем карары үз көченә кермәгән әле.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!