30 октябрь 2025 Яңалыклар

ТР Гидрометүзәге якындагы биш көндә аномаль җылы һава торышы булачагын әйтте

Татарстанда октябрь ахырында аномаль җылы һава торышы урнашты. Хәзер республика буенча уртача тәүлеклек температура климатик нормадан 6 градуска югарырак. Бу хакта «Татар-информ»га бүген ТР Гидрометеорология үзәге башлыгы Феликс Гоголь хәбәр итте.

«Якындагы биш көндә җылы аномалия сакланачак, температура климатик нормадан 3-4 градуска югарырак булыр дип көтелә. Республикада һава торышына җылы циклоннар йогынты ясый. Иртәгә урыны белән бераз явым-төшем булуы ихтимал. Аннары көньяк циклон көтелә, ул республиканың бер өлешен эләктерәчәк, шулай ук бераз явым–төшем дә булырга мөмкин», - дип сөйләде ул.

Хәзер Татарстанда уртача тәүлеклек температура +1,5...+2 градус булырга тиеш. Әмма алдагы көннәрдә температура +6...+7 градуска югарырак иде.

«Температура фоны акрынлап төшәчәк, ләкин барыбер ул климатик нормадан югарырак булачак», – дип өстәде Гоголь.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!