Бүген «Татар-информ» мәгълүмат агентлыгы мәйданчыгында Татарстан Республикасы Фәннәр академиясенең Ш. Мәрҗани исемендәге Тарих институты Ватанны саклаучылар елы кысаларында әзерләнгән ике яңа басманы: «Җиңү календаре. Бөек Ватан сугышы елларында (1941-1945) татарлар һәм татарстанлылар» һәм «1941-1945 елларда мөселманнарның Диния нәзарәтләре» китапларын тәкъдим итте.
«Җиңү календаре» монографиясе ТАССРда сугыш елларындагы көндәлек вакыйгаларны: бүләкләүләрне, указларны, гражданнарның хикәяләрен сөйли. Укучы китапны ачып, Бөек Ватан сугышы чорында ТАССРда тормышның көннән-көн ничек үзгәрүен белә алачак. Һәм тасвирланган вакыйгаларның хронологик эзлеклелектә бармый. Китапта 366 төрле тарих яки тарихи факт тупланган.
«Монда материал 1 гыйнвардан 31 декабрьгә кадәр бирелгән. Һәр бит сугыш елларында Татарстанга бәйле берәр вакыйгага яки каһарманмы, башка танылмаган берәр шәхескә багышланган. Басманы китапның теләсә кайсы өлешеннән ачып укырга мөмкин», – диде Ш. Мәрҗани исемендәге Тарих институтының Яңа тарих бүлегенең әйдәп баручы фәнни хезмәткәре, тарих фәннәре докторы Әлфия Галләмова.
«Мөселманнарның Диния нәзарәтләре» дигән икенче монография «Бөек җиңү наркомнары» сериясе кысаларында басылып чыкты һәм мөселманнарның Диния нәзарәтләренең, гади дин тотучыларның фашистларны җиңүгә керткән өлеше турында сөйли. Ш. Мәрҗани исемендәге Тарих институты директорының фәнни эшләр буенча урынбасары Марат Гыйбатдинов сүзләренчә, Бөек Ватан сугышы елларында совет дәүләтенең дингә карашы үзгәргән. Китапта Советлар Союзы җитәкчелегенең дингә мөнәсәбәтендәге үзгәрешләр, шулай ук Бөек Ватан сугышы вакытында бөтен СССР мөселманнарының нинди батырлыклар кылганы тасвирлана.
Китапларны алу өчен Ш. Мәрҗани исемендәге Тарих институтына мөрәҗәгать итәргә мөмкин.
Сүз уңаеннан, хәзерге вакытта Татарстанда «Яшьләр һәм балалар» илкүләм проекты гамәлгә ашырыла.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез