Татарстанның Зәй районы республика шефлыгындагы Рубежное шәһәренә 10 тонна шешәле су һәм төзекләндерү-яңарту эшләре өчен 10 кубометр каен тактасы тапшырды. Бу хакта республика шефлыгындагы Луганск Халык Республикасы территорияләре кураторы, вице-премьер Фәнил Әһлиуллин аппаратында хәбәр иттеләр.
«Без 2022 елда азат ителгәннән соң, беренчеләрдән булып, Лисичанскига, ә аннары Рубежноега килдек. Шуннан бирле хәрбиләргә дә, гади халыкка да даими рәвештә ярдәм күрсәтәбез. Бүген без гуманитар колонна составында бу территорияләр өчен иң кирәкле әйберләр – 10 тоннадан артык эчә торган су һәм ремонт-яңарту эшләре өчен агач материаллары алып килдек», – диде Зәй районы башлыгы Раил Кәримов.
Аның сүзләренчә, гуманитар йөкне илтү Татарстан вице-премьеры Фәнил Әһлиуллин белән тыгыз элемтәдә алып барыла.
«Һәр сәфәрне килештерәбез, гел элемтәдә, оештыруда һәм озата баруда аның командасыннан ярдәм тоябыз. Ике ел эчендә Рубежноеда күп нәрсә яхшы якка үзгәрде – әйбәт юллар барлыкка килде, социаль объектлар яңадан торгызыла. Без аларның һәммәсен диярлек беләбез һәм тулысынча җиңүгә ирешкәнче булышуны дәвам итәчәкбез», – диде Зәй районы башлыгы.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез