Биредә 4 миллионнан артык кеше – 175 милләт вәкиле дуслык, күршелек һәм хезмәттәшлек атмосферасында яши. Бу хакта ТР Дәүләт Советының Мактаулы рәисе, Татарстан халыклары ассамблеясе рәисе Фәрит Мөхәммәтшин «Халыкларның һәм конфессияләрнең үзара мөнәсәбәтләрен оештыру: Россия моделе» конференциясендә белдерде, дип хәбәр итә республика парламентының матбугат хезмәте.
Мөхәммәтшин республикада милләтара мөнәсәбәтләрне һәм конфессияара татулыкны саклау һәм ныгыту юнәлешендә системалы эш алып барыла, дип ассызыклады.
«Татарстанда милли сәясәтнең төп хокукый нигезләре Россия Федерациясе һәм Татарстан Республикасы Конституцияләрендә беркетелгән. Аларны гамәлгә ашыру норматив документлар, программалар, оештыру механизмнары һәм чаралар комплексына нигезләнә. Әлеге нигезләмәләр федераль дәрәҗәдә расланган Россия Федерациясе дәүләт милли сәясәте стратегиясе, Дәүләт миграция сәясәте концепциясенең дәүләт телләре сәясәте нигезләре нәтиҗәсендә яңа үсеш импульсы алды», – диде ТР Дәүләт Советының Мактаулы рәисе.
Фәрит Мөхәммәтшин билгеләп үткәнчә, республика әлеге стратегик әһәмиятле документларны гамәлгә ашыруга актив кушылды. Быел майда ТР Рәисе указы белән Татарстанда дәүләт милли сәясәтенең яңартылган концепциясе расланды, ул республиканың принципларын һәм өстенлекләрен гомумроссия кыйммәти-хокукый ориентирлары белән бер калыпка салды
Милләтара һәм конфессияара мөнәсәбәтләрне гармонияләштерү, миграция сәясәтен гамәлгә ашыру мәсьәләләрендә дәүләт хакимияте органнары белән беррәттән иҗтимагый оешмалар да актив катнаша. Бу, аерым алганда, Татарстан халыклары ассамблеясе һәм Дуслык йорты.
«Бүген Татарстанда балалар бакчаларында һәм мәктәпләрдә балаларны туган телдә укыту һәм тәрбияләү өчен барлык шартлар бар. Республикада этномәдәни белем бирү компоненты булган 124 мәктәп эшли. Шул исәптән чуваш, удмурт, мари, мордва һәм яһүд телен өйрәнү мөмкинлеге булган белем бирү учреждениеләре бар. Күпмилләтле якшәмбе мәктәбе дә актив эшли», – дип ассызыклады Фәрит Мөхәммәтшин.
Конференциядә дәүләт һәм иҗтимагый оешмалар вәкилләре, югары уку йортлары, мәдәният эшлеклеләре, галимнәр һәм милләтара мөнәсәбәтләр өлкәсендәге белгечләр катнашты. Фәнни һәм эксперт җәмәгатьчелегенең игътибар үзәгендә милләтара һәм диннәрара мөнәсәбәтләрне гармонияләштерү һәм Россия халыклары бердәмлеген ныгытуда гражданлык җәмгыяте институтларының роле мәсьәләсе торды.
БЕЗНЕҢ МАКС КАНАЛЫНА ЯЗЫЛЫГЫЗ!
Фикер өстәү
Фикерегез