07 июль 2026 Яңалыклар

65 яшьлек хатын-кыз ФСБ һәм Үзәк Банк «хезмәткәрләренә» 6 миллион сум акчасын биреп җибәргән

Түбән Кама районында яшәүче хатын-кыз, мошенниклар тозагына эләгеп, 6 миллион сум акчасын югалткан. Бу хакта “Татар-информ” Эчке эшләр министрлыгы мәгълүматларына таянып яза.

Аферистлар Кама Аланында яшәүче бу ханымга шалтыратып, үзләрен идарәче компания хезмәткәрләре буларак таныштырган. Шуннан соң хатын-кызга, имештер, Роскомнадзордан хәбәр килгән. Соңыннан пенсионер белән ФСБ һәм Үзәк Банк “хезмәткәрләре” элемтәгә кергән.
Мошенниклар хатын-кызны, янәсе, счетындагы акчаларын кемнеңдер Украинага күчерергә маташуына ышандырган. Пенсионер шуларның кушуы буенча счетыннан 5 миллион сум алып, аны курьерга тапшырган. Икенче көнне аферистлар, сезнең исемгә кредит алганнар, дип алдап, беркатлы хатын-кызның тагын 1 миллион сум акчасын кулга төшергән. Бу акчаны инде ул эшендәге җитәкчесеннән бурычка алып торган.
Әлеге очрак буенча аеруча зур күләмдә мошенниклык турында җинаять эше кузгатылган.

БЕЗНЕҢ МАКС КАНАЛЫНА ЯЗЫЛЫГЫЗ!