Төн уртасында коточкыч хәбәр килде. Кореяда бәлагә тарыган якташыбыз, Мамадыш кызы Венера Сапурина вафат булган. Бу хакта әнисе Марина апа шалтыратып әйтте.
Газетада язма чыккач, бик күпләр ярдәм кулы сузды. Танылган җырчы, блогерлар мәгьлүмат таратырга булышты, Гөлия Вәлиәхмәтова язылучылары белән зур суммада акча да җыйды.
Иртәгә Венераның анализы әзер булырга тиеш иде. Ул яхшы булса, чит ил табиблары алып кайтырга рөхсәт бирәсе иде. Тик булмады. 26 яшьлек Венера мәңгелеккә күзләрен йомды.
Әнисе Марина апаның өзгәләнүен күреп күңел елады. Аның баласын туган якка алып кайтып, аякка бастырасы килде. Без аның белән һәркөн сөйләшеп тордык. Хәтта көнгә берничә тапкыр шалтыратыша идек. Венераны алып кайту турында хыялландык. Кызганыч, өмет акланмады.
Марина апага сабырлык телибез. Ул олы йөрәкле, баласы өчен утка да, суга да керергә риза иде. Венераның урыны оҗмахта булсын!
Гөлгенә Шиһапова
Урын өстендәге кызын чит илдән алып кайта алмый интегүче ана: «Булышыгыз миңа, кешеләр!»
