Татарстан Хөкүмәте Угра елгасында Бөек туктап тору тәмамлану көне урынына Суворовның Альп тауларын кичү датасын Бөтенроссия бәйрәме итү инициативасы белән чыкты. Казан Кремленең рәсми вәкиле Лилия Галимова ТР Министрлар Кабинетында узган брифингта шул хакта хәбәр итте.
«Россиянең күпмилләтле халкы өчен һичшиксез берләштерүче ролен уйнаган даталар һәм вакыйгалар гына истәлекле көн булырга тиеш. Без нәкъ менә шуннан чыгып эш итәбез дә. Россия безнең тарихыбыздагы күп кенә бөек бәрелешләрне хәтерли. Мисал өчен, Суворовның Швейцариягә походын атап үтәргә мөмкин. Ни өчен әлеге датаны Россия тарихындагы истәлекле көн итмәскә?» — дип искәртте Галимова.
Әлеге вакыйга Суворовның полководец сыйфатында зур казанышларыннан берсе булган. Бу поход рус гаскәрләренең җиңүе белән тәмамланган, дип искәртте Казан Кремленең рәсми вәкиле.
Моннан тыш, быелның сентябрендә Альп таулары аша Швейцария походына 220 ел тулачак, дип өстәде ул.
Галимова сүзләренчә, Рөстәм Миңнеханов РФ Дәүләт Думасына Татарстан Президенты исеменнән Угра елгасында Бөек туктап тору тәмамлану көнен Россия истәлекле даталар календаренда закон нигезендә беркетү инициативасына тискәре җавап җибәргән.
Без бу хакта бер хәбәр иткән идек инде.
