Бүген, 2 гыйнварда, Татарстанда шактый салкын, шул ук вакытта болытлы һәм карлы һава торышы көтелә. Бу хакта Гидрометеорология һәм әйләнә-тирә мохитне күзәтү үзәге хәбәр итә.
Республикада аязучан болытлы һава булачак. Төбәктә урыны белән, Казанны да кертеп, бераз кар фаразлана, ул көндез урыны белән (Казанда түгел) күбрәк явачак.
«Татар-информ» хәбәр иткәнчә, кайбер районнарда, шулай ук буран вакытында күз күреме 1-2 километрга кадәр начарланырга мөмкин. Гадәттән тыш хәлләр министрлыгында Татарстанда яшәүчеләргә саклык чаралары турында искәрттеләр.
Җил төньяк-көнбатыштан секундына 5-10 метр тизлектә фаразлана, аннары ул төньяк-көнчыгыш юнәлешен алачак. Урыны белән ул секундына 14 метрга кадәр (Казанда 13 метрга кадәр) көчәергә мөмкин. Юлларда бозлавык хасил була.
Көндез Татарстанда һава температурасы -15..-20 градус, республиканың төньягында -23 градус, Казанда -20..-22 градус була.
