Быел Бөтенроссия “Һөнәр” яшь режиссура фестивалендә татарстанлылар гына катнашачак

Камал театры гамәлгә куеп, ун ел дәвамында уздырган “Һөнәр” Бөтенроссия яшь режиссура фестивален быел да Кариев театры үткәрә. Фестивальнең быелгы үзенчәлекләре һәм катнашучылары турында матбугат очрашуында сөйләтеләр.

Фестиваль быел Кариев театрында 1-6 декабрьдә узачак. Алты көн дәвамында шәһәрнең алты мәйданчыгында Татарстан театрларының 11 коллективы үз спектакльләрен тәкъдим итәчәк.
– Пандемия сәбәпле, “Һөнәр” фестиваленең уздырылуы октябрьга кадәр сорау астында иде. Нәтиҗәдә, үз өстебезгә зур җаваплылык алып, без аны оффлайн-режимда үткәрергә карар кылдык. Әлбәттә, география күпкә тарайды, узган елгы фестивальга Сахалиннан ук килсәләр, быел катнашучылар арасында татарстанлылар – Буа, Бөгелмә, Минзәлә, Чаллы курчак театрлары һәм казанлылар гына, – дип сөйләде фестиваль директоры һәм Кариев театры җитәкчесе Гүзәл Сәгыйтова.

Проект кысаларында яшь режиссерлар әйдәп баручы сәхнә осталары уздырачак семинарларда, мастер-класслада катнашачак, тәнкыйтьчеләр һәм театр белгечләре белән аралашачак. Уку-укыту программасы Татар китабы йортында узачак.

– Татарстан театрларында читтән килгән режиссерлар күбрәк эшләсен иде дип хыяллана идем. Без бит кайбер проблемаларны күрмәскә мөмкин, ә читтән килгән кешегә барысы да күренә. Өстәвенә, бездә яхшы режиссерлар да санаулы гына. Үзебез куеп, үзебез карап, үзебезгә кул чабып утырып кына булмый. “Һөнәр” фестивале минем хыялыма елдан-ел якыная, – диде Камал театры режиссеры Айдар Җәббаров.
Фестивальдә катнашучы спектакльләргә бәяне кем бирә соң? Бу сорауга Камал театрының махсус проектлар кураторы Нияз Игъламов җавап бирде:

– Быелгы тәнкыйтьчелләр коллегиясендә Казаннан мин үзем, Рауза Солтанова, Айсылу Кадыйрова булачак, фикер алушыларда Чиләбедән Владимир Спешков, Санкт-Петербургтан Оксана Кушляева, Надежда Стоеваның да катнашуы көтелә, – диде ул.

Лилия Гыймазова