Ольга Павлова: Спорт теләсә кемгә мөмкинлекләр ача

Казанда физик культура турында сөйләштеләр. Фәнни җыенны Казан дәүләт педагогика институтындагы физик культура факультетының элеккеге деканы, биология фәннәре докторы, профессор Ринат Абзаловның 85 яшьлек юбилее уңаеннан оештырдылар. Физик культурага мөнәсәбәт турында Дәүләт Думасы депутаты, Россиянең синхрон йөзү буенча федерациясе вице-президенты, “Балалар спорты” проекты модераторы Ольга Павлованың фикерләрен белештек.

– Ольга Ивановна, бүгенге чара халык өчен ни дәрәҗәдә мөһим дип саныйсыз?
– Спорт ул – социаль баскыч. Теләсә кемгә мөмкинлекләрен ачарга булыша. Спорт белән шөгыльләнүчеләрнең саны, сыйфаты һәм гомер озынлыгы арасында турыдан-туры бәйләнеш бар. Бүген өлкәннәрнең дә спорт белән шөгыльләнүе мөһим. Бу – безнең илкүләм максат, бурычлар. Безгә сәламәт халык кирәк. Соңгы елларда республикада еш уздырыла торган халыкара, илкүләм ярышлар халыкта сәламәт яшәү рәвешен булдыруга юнәтелгән. Моның өчен балаларны кечкенәдән физкультура белән кызыксындырырга, кешеләрне спортка күбрәк тартырга, тиешле инфраструктура булдырырга кирәк. Бу конференциядә тәҗрибә бар, монда бөтен галимнәр җыелган. Бер сүз белән әйткәндә, ул бөтен спорт дөньясы берләштерә.

– Ринат Абзалов укучыларын ничек тәрбияли иде?
– Ринат Абзалович – танылган галим. Ул 1976 елдан бирле пединститутның физик культура факультетын җитәкләде. Меңләгән студент, галим, төрле җитәкчеләр әлеге факультетны тәмамлады. Кая барсаң да, бар җирдә – безнең укучылар. Иң мөһиме –Татарстанны яратучы, битараф булмаган, кыю кешеләр. Ул безне шушы сыйфатларга, гомумән, көчле рухлы булырга өйрәтте. Кулга диплом алганда, сез булачак укытучыларга кеше алдында тәмәке тартырга, сүгенергә ярамый дип әйтә иде. Без зур хәрефтән педагог булырга тырыштык.

– “Балалар спорты” проекты модераторы буларак, нинди мәсьәләрне хәл итәргә туры килә?
– Бу – федераль проект. Дүрт ел тормышка ашырыла инде. Мин аның Татарстандагы координаторы. Аның партнерлары – Татарстан Спорт һәм Мәгариф министрлыклары. Татарстанның үзенчәлеге бар. Без “Спортта минем тарих” дигән бәйге дә оештырабыз. Иҗтимагый совет бүген спортта хәл ителәсе мәсьәләләрне күтәрә. Безнең бурыч –мөрәҗәгать иткән һәр балага, һәр гаиләгә ярдәм итү. Авыру балалар – аерым тема. Спортчылар мәктәпләргә барып, укучылар белән аралаша. Балаларны спорт объектларына чакырабыз. Проект кысасында мәктәпләрнең спорт заллары төзекләндерелә. Министрлыклар күтәрмәгән, катлаулы мәсьәләләргә игътибар итәбез. Яңа уку елына тырышып әзерләгән мәктәпләргә спорт җиһазлары тапшырабыз. Ятимнәргә булышабыз. Бездә башка төбәкләрдә булмаган күп нәрсәләр тормышка ашырыла.

– Мәктәпләрдә физкультура дәресләрен укытуга игътибар җитәме?
– Әлбәттә, безгә һәр балага физкультура белән бушлай шөгыльләнү өчен мөмкинлекләр тудыру, физкультура дәресләренең сыйфаты бик мөһим. Шулай ук өстәмә белем бирүдә нинди программаларның тормышка ашырылуы да. Физкультура дәресләрен һәм өстәмә белем бирү программаларын методик яктан тәэмин итүгә кагылышлы сораулар элеккечә һаман да күп әле. Аларны хәл итү турыдан-туры педагогларны әзерләү сыйфатына бәйле.

Сәрия Мифтахова