Рөстәм Миңнеханов Гадәттән тыш хәлләр министрлыгы коллегиясендә: «Һәр очрак җентекләп тикшерелсен»

Татарстанда янгында һәлак булучылар саны да, суда батучыларныкы да арткан. Судагы проблема 2018 елдан бирле күзәтелә. Бу хакта Россия Гадәттән тыш хәлләр министрлыгының Татарстан буенча идарәсе җитәкчесе еллык коллегия утырышында Рафис Хәбибуллин җиткерде.

– Узган ел Татарстанның 18 районында янгын чыгу очраклары артты. 2020 елда республикада 6 меңгә якын ут чыгу очрагы теркәлде. Аеруча ут Спас, Кайбыч, Яңа Чишмә, Чүпрәле районнарында күп күзәтелде. Янгын белән беррәттән, анда һәлак булучылар саны да арта. 2019 елда 149 кешене югалтсак, 2020 елда бу сан 163 булды. Вафат булган 51 кеше Яшел Үзән, Әлмәт, Биектау, Чаллы, Чистай, Балык Бистәсе районнарында яшәүчеләр, – ди Рафис Хәбибуллин.
Янгыннар хакында сүз чыккач, Алексеевск районында туганнарын коткарган малайга да тукталдылар. Ул малайны янгын хакында хәбәр итүче җиһаз уятканын искә төшерделәр. Рафис Хәбибуллин сүзләренә караганда, әлеге җиһазны куйдыру бик кирәк.
– Татарстанда узган ел 84 меңнән артык янгын хакында хәбәр бирүче җиһаз куелды. 2016 елдан бирле шундый 80 мең йортта 251 мең җиһаз урнаштырылды. Аның ярдәме белән 119 кеше янгыннан коткарылды. Аның 50 се балалар иде, – ди баш коткаручы.
Утырышта катнашкан Татарстан президенты Рөстәм Миңнеханов та янгыннарга тукталды.
– Соңгы 7 елда республикада янгыннар саны 21 процентка, анда үлүчеләр саны 17 процентка кимегән. Уттан зыян күргән һәм гомерләре өзелгән балалар саны да кимү ягында. 2020 елда янгыннарда алдагы елга караганда күбрәк кешене коткарганнар. Уңай динамиканы сакларга кирәк, – диде ул.
Рөстәм Миңнеханов гомумән янгында һәлак булучыларның артып китүенә дә тукталды.
– Һәр очракны яхшылап тикшерергә кирәк. Сәбәпләрен ачыклап, анализлау мөһим, – ди ул. – Суда батучылар саны да арткан. Әлеге проблема 2018 елда да бар иде. Шул вакытта ук район башлыкларына судагы хәлләрне контрольдә тоту бурычы йөкләнде. Татарстанда җәен 154 урында су коеналар. Шуның бары тик 56сында гына коткару пунктлары эшли. Җиһазландырылмаган урыннарны киләчәктә кешеләр ял итә торган итеп үзгәртергә кирәк. Болай эшләгәндә без күп кенә гомерләрне саклап кала алачакбыз,– диде Рөстәм Миңнеханов.
Президент кешеләр күп җыела торган урыннарда, аеруча балалар һәм өлкәннәргә социаль хезмәт күрсәтүче урыннарда янгын куркынычсызлыгын кайгыртырга кушты. Башка төбәкләрдә күзәтелгән хәлләр, бездә булырга тиеш түгел, диде ул.
Тиздән 112 хезмәтенең дә эше артачак. Узган ел әлеге номерга шалтыратучылар арткан, 2 миллион 150 мең кеше мөрәҗәгать килгән. Бу билгеле, пандемия белән бәйле. Быел исә яңа Федераль Закон нигезендә 112 хезмәтенә яңа үзгәрешләр керә. Озакламый бу системага кайнар, салкын су, электр энергиясе һәм җылылык бирү режимнары бозылу хакында да хәбәр итеп торачаклар. Президент әлеге уңайдан Хөкүмәткә һәм район җитәкчеләренә бу хакта өйрәнергә һәм үз тәкъдимнәрен әзерләргә кушты.
Рөстәм Миңнеханов Гадәттән тыш хәлләр министрлыгы хезмәткәрләренең пенсия белән тәэмин ителүенә тукталды.
– Федераль законнар нигезендә авария-коткару хезмәтләре коткаручылары, янгын сүндерүчеләр бер үк статуска һәм бер үк төрле хокукларга һәм бурычларга ия. Вакытыннан алда пенсиягә чыгу Россия Гадәттән тыш хәлләр министрлыгы коткаручылары һәм янгын сүндерүчеләре өчен генә билгеләнгән. Мондый алымны гаделсез дип саныйбыз. Гадәттән тыш хәлләр министрлыгыннан әлеге юнәлештә эшләүче дәүләт органнар белән берлектә бу мәсьәләне эшләп бетерүегезне, шул исәптән федераль законнарга үзгәрешләр кертү буенча тәкъдимнәр әзерләвегезне сорыйм, – диде Президент.
Утырыш башланганчы Рөстәм Миңнеханов Татарстан Гадәттән тыш хәлләр хезмәткәрләрен кирәкле техника биреп сөендерсә, ахырдан иң алдынгыларга мактаулы исемнәр, рәхмәт хатлары тапшырды.

Гөлгенә ШИҺАПОВА


Фикер өстәү