Кемеров өлкәсендә парашютчылар белән L-410 самолеты шартлау нәтиҗәсендә һәлак булучылар саны тугыз кешегә кадәр арткан. Бу хакта ТАССка Кемеров өлкәсенең Россия ДОСААФ төбәк бүлеге җитәкчесе Виктор Шемоханов хәбәр итте.
«Минем мәгълүматым буенча, экипажның ике әгъзасы һәм җиде парашютчы һәлак булган, ягъни гомуми тугыз кеше. Бортта 17 парашютчы һәм экипажның ике әгъзасы бар иде», — диде агентлык әңгәмәдәше. Ул һәлак булган җиде парашютчының икесе — инструкторлар, дип өстәде.
Аның сүзләренчә, самолет төзек хәлдә булган һәм көн эчендә дүртенче очыш ясаган.
Моннан тыш, штурвал артында тәҗрибәле пилот булган. «30-40 метр биеклектә уң двигатель баш тарткан, бу хәл алар биеклек җыйганда килеп чыга. Штурвал артында тәҗрибәле очучы Александр Владимирович Шейкин була. Ул, юлны кичәргә һәм аэродромга утырырга дип, газны арттырган. Ләкин, күрәсең, ул газга артык каты баскан һәм сул двигатель янган. Алар алдында Журавлево авылы бар иде һәм алар утырту өчен мәйданчык эзләргә мәҗбүр булганнар һәм самолетны утыртканда сул канат җирне эләктереп алган, нәтиҗәдә алар әйләнгәннәр», — дип өстәде Шемоханов. Ул, инциденттан соң Танай аэродромында барлык очышлар туктатылды, дип өстәде.
Медиклар самолет һәлакәтендә 15 зыян күрүчегә ярдәм күрсәтә, дип сөйләделәр Кузбасс катастрофа медицинасы үзәге матбугат хезмәтендә. «15 кеше зыян күрде, алар арасында дүртесе авыр хәлдә, 11 — җиңел», — диделәр матбугат хезмәтендә.
