Татарстанда җылы һәм кояшлы һава торышы атна ахырына кадәр дәвам итәчәк. Әмма төнлә температура 0 градустан түбән булачак. Бу хакта Республиканың Гидрометеорология үзәге хәбәр итте.
Алдагы көннәрдә республикада һава торышына төньяктан килүче антициклон тәэсир итәчәк. Атмосфера басымы сизелерлек артачак.
5 октябрьдә төнлә минималь һава температурасы 2-7 градус салкын булачак. Көндез кояш тәэсирендә температура +11 градуска кадәр күтәреләчәк, явым-төшемнәр көтелми.
Чәршәмбе һәм пәнҗешәмбе, 6-7 октябрьдә, Татарстанда коры һава торышы саклана. Төнлә температура -4 градуска кадәр төшәчәк. Көндез һава +14 градуска кадәр җылыначак.
