Бүген Татарстан Республикасы Президенты Рөстәм Миңнеханов рәислегендә «Татнефть» ГАҖ Директорлар советының чираттагы утырышы узды. Утырыш Татарстан Республикасы Хөкүмәте Йортында барды.
Директорлар советы 2022 елның гыйнварында «Татнефть» ГАҖ бюджеты үтәлеше нәтиҗәләрен карады һәм 2022 елның март аена бюджетын раслады.
Утырышта катнашучылар 2021 елда компаниянең инвестицион программасын үтәү барышы һәм 2022 елга планнар белән таныштылар, 2021 елда инвестицион программаны үтәү нәтиҗәләре тиешле чорда МСФО буенча берләштерелгән финанс хисабын бастырганда игълан ителәчәк, ул 2022 елның март уртасына планлаштырылган. Инвестицияләрнең 2022 елга планлаштырылган детальләре аерым ачылачак.
Директорлар советы Татарстаннан читтә нефть-газ проектларын үстерү турында мәгълүмат белән танышты. 2018 елдан 2021 елга кадәр Россия Федерациясе территориясендә «Татнефть» запаслары үсеше планлаштырылган 123,2 млн. тонна нефть һәм 6,1 млрд. м3 газның 116 процентында бәяләнә. «Татнефть»нең Татарстан Республикасыннан читтә урнашкан биш төбәк территориясендә 33 лицензияле участогы бар, алар эзләү-разведка өйрәнү һәм сынау этапларында 46 ятманы үз эченә ала.
2018 елдан 2021 елга кадәр җир асты байлыкларыннан файдалану өчен 8 участок сатып алынган, аларның 2се Татарстанда 2022 елда эшләнүгә кертелгән инде. Директорлар советы расланган планнар нигезендә «Татнефть» төркеменең Россия Федерациясендә лицензияле участокларында гамәлдәге һәм перспектив проектларны гамәлгә ашыруны дәвам итәргә дигән карар кабул итте.
Утырышта «Татнефть» төркеме шиннар бизнесын үстерү турында KAMA TYRES мәгълүматын тыңланды. Аның нәтиҗәлелеген арттыру өчен 2018 елдан 2021 елга кадәр оештыру структурасын, җитештерү һәм сату челтәре белән идарә итү процессларын оптимальләштерүне үз эченә алган оештыру буенча үзгәртеп корулар үткәрелгән. Нәтиҗәдә, сатуларга идарә итү сыйфаты арткан, бәя куюның бердәм сәясәте формалаштырылган.
«Татнефть» төркеме KAMA TYRES шиннар бизнесы күрсәткече 2021 ел нәтиҗәләре буенча (идарә хисабы мәгълүматлары нигезендә) 9 млрд. сумнан артык тәшкил иткән, бу планнан югарырак. Йогынты ясауның төп факторлары – бәя сәясәте һәм чыгымнарны оптимальләштерү чараларын гамәлгә ашыру.
Бүген «Татнефть» составында шиннар бизнесы предприятиеләре, эксплуатацияләүнең климатик һәм юл шартларын исәпкә алып, транспорт чараларының төрле төрләре өчен 440тан артык шиннар позициясен җитештерә. Ел саен яңа актуаль модельләр үзләштерелә. 2021 елда 40 яңа шин эшләнгән, алар арасында 4 җиңел шиннар линейкасы, карьерлар шартларында файдалану өчен йөк ЦМК шиннары, квадроцикллар өчен яңа шиналар төркеме һ.б.лар бар.
Компания Түбән Камада шиннар җитештерүне киңәйтә. Еллык җитештерү күләме 300 мең йөк ЦМКсы, 1,2 млн. җиңел заманча шиннары булган өстәмә егәрлекләр кертелгән. Шулай ук Казахстанда шиннар проектын гамәлгә ашыру дәвам итә. Елына 3 млн. җиңел һәм җиңел йөк шиннары һәм 0,5 млн. йөк машиналары шиннары егәрлеге булган уртак предприятие 2022 елда эшләтеп җибәрү планлаштырыла.
Климатка йогынтыны киметү өчен «Татнефть» төркеме углерод эзен киметү чараларын тормышка ашыра. 2021 елда Компания углерод интенсивлыгын 245,5 мең тонна СО2-эквга киметкән. Түбән Кама сәнәгать төене районында парник газларын киметү буенча өстәмә чаралар сыйфатында 38 мең үсенте утыртылган. Тулаем алганда, «Татнефть» төркеме 2021 елда 8 млн. агач утырткан.
KAMA TYRES компаниясенең шиннар бизнесын алга таба үстерү инновацияләр һәм яңа технологияләр исәбенә яңа продуктлар булдыру буенча инвестицион проектларны гамәлгә ашыруны, операцион керемнең яңа үсеш нокталарын, инвестиция нәтиҗәлелеген күтәрүне үз эченә ала. Бизнес-юнәлешнең төп стратегик максатларының берсе – «Татнефть» төркеме стратегиясендә билгеләнгән дәрәҗәдә EBITDA буенча рентабельлекне тәэмин итү.
Катнашучылар «Татнефть»тә коррупцияне профилактикалау һәм аңа каршы көрәш буенча мәгълүмат белән таныштылар. Компаниядә бизнеста коррупциягә каршы тору буенча чаралар комплексы гамәлгә ашырыла, ул контрагентларны комплекслы тикшерүне, тәэмин итүчеләрне һәм подрядчыларны сайлаганда конкурс процедураларын, эчке тикшерүләр һәм аудитларны үз эченә ала. Коррупциягә каршы тору мәсьәләләре буенча тәэмин итүчеләр, подрядчылар һәм сатып алучылар белән эшләүгә зур игътибар бирелә. «Татнефть»нең бу юнәлеш буенча эшчәнлеге нәтиҗәләре Россия сәнәгатьчеләр һәм эшкуарлар берлегенең коррупциягә каршы илкүләм рейтингында югары бәяләнгән. Хисап елында гамәлдәге регламент базасына төзәтмәләр кертү һәм яңа стандартлар эшләү дәвам ителгән. Профилактик чараларны көчәйтү һәм әлеге өлкәдә хезмәткәрләрнең компетенцияләрен арттыру өчен Корпоратив университет базасында укыту курслары гамәлгә ашырыла. Агымдагы елда компаниянең коррупциягә каршы практикасын көчәйтү буенча эш дәвам итәчәк.
