Санкт-Петербургның хокук саклау органнары хезмәткәрләре студент кызны көчләүдә шикләнелүчене тоткарлаган. Бу хакта РЕН ТВ хәбәр итә.
Журналистлар мәгълүматы буенча, тәртип сакчыларына шәһәр университетларының берсенең 21 яшьлек студенты мөрәҗәгать иткән. Аның сүзләренә караганда, төнге клубта ял иткәннән соң, дуслары аңа такси чакырткан. Мурино шәһәре ягына барган вакытта ул сәфәре өчен түли алмавын аңлый, шуңа бәйле рәвештә такси йөртүчесе аны машинадан төшереп, китеп барган.
Билгеләп үтелгәнчә, бу төннең алдагы вакыйгаларын кыз начар истә калдырган, чөнки исерек хәлдә булган.
Телеканал мәгълүматлары буенча, 15 апрельдә 01:20 сәгатьтә билгесез кеше зыян күрүчене Мәскәү шоссесы янындагы полигонга алып килгән һәм көчләгән. Шуннан соң ул кызны М-11 трассасының 668 нче чакрым түләү пунктына кадәр илтеп куйган
Зыян күрүче ярдәм сорап табибларга мөрәҗәгать иткән, дип билгеләп үтелә.
Журналистлар мәгълүматы буенча, тәртип сакчылары шикләнелүче хәрәкәт иткән автотранспорт чарасын билгеләгән.
Ачыкланганча, 36 яшьлек һәм 44 яшьлек ир-ат утырган машина Тверь өлкәсенең Торжке шәһәрендә туктатылган.
«44 яшьлек ир-ат, беренчел мәгълүматлар буенча, көчләүче булган. Аны тоткарлаганнар», — диелә басмада.
