Бүген Казан Суворов хәрби училищесында 75 нче чыгарылыш узды. Тантаналы чарада Татарстан Премьер-министры Алексей Песошин катнашты.
Быел училищены 71 суворовчы тәмамлый, шуларның 10сы – «Укуда аерым уңышлары өчен» медальләре белән бүләкләнә. Чыгарылыш укучылары уку һәм спорт эшчәнлегендә югары нәтиҗәләр күрсәткәннәр.
Алексей Песошин училищеның команда, укытучылар һәм шәхси составын 75 нче чыгарылыш белән котлады. Ул билгеләп үткәнчә, Бөек Ватан сугышының авыр елларында совет дәүләте суворов училищеларын булдыру, аларда ятим калган балаларны җыю, аларга белем һәм тәрбия бирү мөмкинлеге тапкан. Беренче суворовчылар арасында «полк уллары» — фронтта хәрәкәт итүче хәрби частьләр егетләре була.
Татарстан Хөкүмәте башлыгы әйтүенчә, училище меңләгән кешегә тормышка юллама биргән, алар арасында Ватанны каһарманнарча саклаучылар, танылган гаскәр башлыклары һәм галимнәр бар. Училищедә тәрбияләнүчеләр, югары хәрби-уку йортларын тәмамлагач, частьлар һәм берләшмәләр белән уңышлы командалык итәләр, РФ Оборона министрлыгының баш һәм үзәк идарәләре штабларында намус белән эшлиләр. Аларның күбесе бүген махсус хәрби операция уздыру зонасында хәрби бурычларны батырларча үти, диде Татарстан Премьер-министры.
«Бүген без сездә рух көчен һәм ныклык үстергән, патриотизм хисе тәрбияләгән командирларга, укытучыларга һәм тәрбиячеләргә рәхмәт белдерәбез. Аларның профессиональлеге аркасында сезнең киләчәктә үз тормышыгызны уңышлы төзергә һәм Ватаныбызга намуслы хезмәт итәргә мөмкинлек бирүче кирәкле нигезегез бар. Барысын да бүгенге мөһим вакыйга белән котлыйм. Сезгә Ватаныбыз файдасына нәтиҗәле эш телим», – диде Алексей Песошин.
Шулай ук Татарстан Премьер-министры һәм Казан Суворов училищесы башлыгы Валерий Миронченко чыгарылыш укучыларына аттестатлар һәм «Укуда аерым уңышлары өчен» медальләре тапшырды.
