Бүген Татарстан Республикасы Рәисе Рөстәм Миңнеханов Казахстан Республикасы Президенты Касыйм-Җомарт Токаев белән очрашты. Очрашу Казахстан Республикасы Президенты резиденциясендә узды.
Исегезгә төшерәбез, Рөстәм Миңнеханов Астанада «ИННОПРОМ. Казахстан» халыкара күргәзмәсе эшендә катнашу өчен эш сәфәрендә.
Очрашу барышында Рөстәм Миңнеханов Касыйм-Җомарт Токаевка кунакчыллыгы һәм илләр арасындагы мөнәсәбәтләрне ныгытуга юнәлдерелгән Татарстан-Казахстан хезмәттәшлеген үстерүгә шәхси игътибары өчен рәхмәт белдерде. Рөстәм Миңнеханов шулай ук соңгы елларда Казахстанның уңышлы социаль-икътисадый үсешен билгеләп үтте. Казахстан үсешнең яңа әйләнешенә чыга, анда милли байлыкны гадел бүлүне тәэмин итүгә аерым игътибар бирелә. Сезнең халыкка «Гадел Казахстанның икътисадый курсы» дигән мөрәҗәгатегез белән зур кызыксыну белән таныштым. Икътисадны диверсификацияләү, җитештерү циклын локальләштерү, авыл хуҗалыгы өлкәсендәге позицияләрне ныгыту, транспорт-логистика потенциалын гамәлгә ашыру, инновацияләрне цифрлаштыру һәм кертү, илегез һәм чит ил инвесторларына ярдәм итү, туризм тармагын үстерү һәм башка юнәлешләр өлкәсендәге тәҗрибәгез Татарстанга да кызыклы булыр дип ышанам», — диде Рөстәм Миңнеханов.
Әңгәмә вакытында яклар шулай ук хәзерге вакытта Казахстан Республикасы территориясендә гамәлгә ашырыла торган уртак проектларны гамәлгә ашыру барышы турында фикер алыштылар.
Рөстәм Миңнеханов һәм Касыйм-Җомарт Токаев үзара сәүдә-икътисадый һәм мәдәни хезмәттәшлекне үстерү перспективалары мәсьәләләре буенча фикер алыштылар. «Безнең хезмәттәшлек өчен мөмкинлекләр күп, беренче чиратта, икътисад өлкәсендә. Ел саен товар әйләнеше артуга карамастан, без әлегә барлык мөмкинлекләрне дә тулысынча кулланмыйбыз. Әлеге процесска динамика бирергә һәм үзара бәйләнешне көчәйтергә кирәк», — дип саный Рөстәм Миңнеханов.
Ул мәдәният, фән, мәгариф, туризм һәм спорт өлкәләрендә үзара хезмәттәшлекне үстерүнең мөһимлеген ассызыклады. «Татарстан югары уку йортларында Казахстаннан 1200дән артык студент белем ала. Республикада казахларның Милли-мәдәни автономиясе актив эшли. Казахстан территориясендә яшәүче татар җәмәгатьчелегенә — 200 меңнән артык кешегә ярдәм иткәнегез өчен аерым рәхмәт белдерәсем килә», — дип билгеләп үтте Татарстан Республикасы Рәисе.
Очрашу ахырында Рөстәм Миңнеханов кыскача » Россия – Ислам дөньясы: KazanForum» халыкара икътисадый форумы,»Киләчәк Уеннары» спорт, фән һәм технологияләр тоташындагы яңа халыкара проект, БРИКС һәм БРИКС+ дәүләт башлыклары саммитына әзерлек барышы һәм 2024 елда Татарстан Республикасында планлаштырыла торган башка колачлы вакыйгалар турында сөйләде.
Рөстәм Миңнеханов Казахстанның да әлеге чараларда катнашачагына ышаныч белдерде һәм Касыйм-Җомарт Токаевны Россия Федерациясенә визиты кысаларында Татарстан Республикасына тагын да тапкыр килергә чакырды.
