SuperJob эш эзләү сервисы, Яңа елга иң начар бүләкләр исемлеген төзү ниятеннән, сораштыру уздырган. Начар бүләкләр исемлеге шактый ук озын булып чыккан.
Белгечләр мәгълүматларына караганда, респондентларның 12 проценты бәйрәмгә кием-салым бүләк итмәүне хуп күрә: алар оекбаш, халат, свитер, футболка, башлык һәм шарфны (бигрәк тә Яңа ел рәсемнәре белән) бүләккә санамый.
Сораштыруда катнашучыларның 9 проценты сөлге, язу-сызу, спорт, урын-җир кирәк яраклары, чәчәкләр, пазл, бижутерия ише әйберләрне бүләк итмәүне һәм бүләккә алмауны хуп күрә. Ә 4 проценты косметика һәм гигиена әйберләрен уңышсез бүләк дип саный. Антирейтингка шулай ук сувенирлар (уенчыклар, сын, магнит, шәмнәр), тәм-томнар һәм кухня кирәк-яраклары эләккән. Мондый бүләк респондентларның 3 проценты күңеленә хуш килми.
Шул ук вакытта сораштыруда катнашучыларның 18 проценты, иң начары – Яңа елда гомумән котлаусыз, бүләксез калу, дигән фикердә. Ә инде һәр өчесенең берсе Яңа елда үзләренә начар бүләк эләкмәгәнлеген белдергән.
