2023 ел дәвамында Татарстанда 9 329 урынлык сигез мәктәп ачылган. Аларның дүртесе Казанда төзелгән, икесе — Чаллыда, берешәр — Арча һәм Тукай районнарында. Казандагы 19 нчы гимназиягә өстәмә корпуста тагын 300 урын барлыкка килгән. Бу хакта, елга нәтиҗәләр ясап, республиканың Мәгариф һәм фән министрлыгы хәбәр итте.
Ведомство матбугат хезмәтендә билгеләп үтүләренчә, Татарстанда «Мәгариф» илкүләм проектын гамәлгә ашыруга 7 млрд сум бүлеп бирелгән, шуларның 5,5 млрд сумы — федераль бюджет акчалары, ә 1,5 — республика казнасыннан финанслашу. Төбәк биш проектны үтәүдә катнашты: «Заманча мәктәп», «Цифрлы белем бирү мохите», «Һәр баланың уңышы», «Россия Федерациясе гражданнарын патриотик тәрбияләү» һәм «Социаль активлык».
Министрлыкта шулай ук милли проектның субсидия чараларын тормышка ашыру нәтиҗәләре белән уртаклаштылар. Акчалар түбәндәге объектларга киткән:
— 6,6 млрд сум мәктәп төзелешенә һәм спорт залларын ремонтлауга туры килде (Чүпрәле һәм Теләче районнары);
— мәгариф оешмаларының матди-техник базасын яңартуга, шул исәптән Яшел Үзән районындагы «Үсеш ноктасы» 66 үзәген, «Кванториум» технопаркын төзүгә, Азнакай, Бөгелмә, Зәй, Яшел Үзән, Спас районнарында ОВЗлы балалар өчен биш мәктәптә матди-техник базаны яңартуга һәм тагын 40 мәктәпне җиһазландыруга 343,8 млн сум акча тотылган. 426 учреждение РФ һәм ТР дәүләт символлары комплектлары белән җиһазландырылган.
— 93,3 млн сум педагогларга түләүгә, авыл җирлегендә һәм халкы 50 меңгә кадәр булган шәһәрләрдә укытучыларны эшкә урнаштыруга тотылган. Шулай ук 734 мәктәптә балалар иҗтимагый берләшмәләре белән тәрбия һәм хезмәттәшлек буенча директор киңәшчесе ставкасы барлыкка килгән.
Моннан тыш, милли проект кысаларында грант проектлары гамәлгә ашырылган. «Заманча мәктәп» һәм «Социаль активлык» проектлары буенча 75,7 млн сум акча җәлеп ителгән. Шул уңайдан Әгерҗе, Азнакай, Бөгелмә, Алабуга, Түбән Кама районнарыннан, Казан һәм Яр Чаллыдан 17 мәктәп 2023 елда балаларның әти-әниләренә яки законлы вәкилләренә психологик-педагогик, консультатив, методологик ярдәм күрсәтүгә грантлар алган. Педагогик кванториум Яр Чаллы дәүләт педагогика университетында ачылган, ә Азнакай, Түбән Кама, Нурлат һәм Чистай районнарында мәктәпләр «Социаль активлык» федераль проекты кысаларында җиңү яулаган. Грант акчаларын алар мәктәпләрдә мәктәп ирекле отрядлары проектлары үсешенә җибәрәчәк.
Моннан тыш, министрлыкта искә төшергәнчә, мәктәпләр төзелешенә өстәмә рәвештә 2,6 млрд сум каралган, шуларның 2,1 млрд сумы федераль бюджет бүлеп биргән. Аларның 2,2 млрды «Якты үзән» торак комплексында мәктәп төзелешенә юнәлдерелгән, 256,9 млн — Усады авылындагы мәктәпкә, ул 2024 елда үз ишекләрен ачачак. 94,3 млн сум «Җәй» торак комплексында гомуми белем бирү учреждениесе төзелешенә җәлеп ителгән. Усадтагы мәктәп кебек үк, ул да 2024 елда ачылачак.
Мәктәпләрдән тыш, «Демография» милли проекты буенча 2023 елда Казанда 440 балага исәпләнгән ике балалар бакчасы төзелгән. Бу максатларга 310,8 млн сум юнәлдерелгән.
Милли проектлар Россиядә 2019 елдан Президент Владимир Путин указы буенча гамәлгә ашырыла.
