Әлеге сорауга парламент рәисе Фәрит Мөхәммәтшиннан тулы җавап алдык. Журналистлар белән очрашуда бишенче чакырылыш Дәүләт Советы эшчәнлегендә иң әһәмиятле мәсьәләләргә тукталды ул.
Сүзен Президент Рөстәм Миңнехановның бер генә закон проектын да кире какмавын әйтеп башлады. “Димәк, тормыш таләп иткән законнар язганбыз”, – диде. Бер генә закон проектының да кире борылмавы тагын хакимият тармаклары һәм прокуратура белән бергә аңлашып эшләү белән дә бәйле. Закон әле туып килгән чагында ук вак иләк аша үткәрелә, аның Россия һәм Татарстан Конституциясе, гамәлдәге законнар, җәмгыять тормышы белән туры килү-килмәве тикшерелә һәм каршылыклар алдан ук бетерелә.
Фәрит Мөхәммәтшин бишенче чакырылыш Дәүләт Советы эшчәнлегендәге кайбер яңа алымнарга да тукталды. Мәсәлән, парламент быел “Законнарны бергә язабыз” дигән проект башлаган иде. Бүгенгә халыктан 200ләп тәкъдим кергән. Алар төрле комитетларга җибәрелә һәм депутатлар, законнар язганда, халык фикерләрен дә исәпкә ала. Бу эшне яңа парламент та дәвам иттерәчәк. Шулай ук комитетларда эксперт советлары, законнарның тормышта ничек кулланылуын, яшәешебезгә ярашуын тикшереп торучы мониторинг төркемнәре оешу да – яхшы үзенчәлек.
Дәүсовет Россия төбәкләре парламентлары белән дә тыгыз элемтәдә тора. Безнекеләр аларның күбесе белән хезмәттәшлек турында килешү төзеде һәм закон проектларын аларга да юллый. Димәк, үзара киңәш-табыш иткәч, Закон проектларының камил законга әйләнү ихтималы бик зур. Кунак ашы кара-каршы дигәндәй, һәр сессия утырышында безнекеләр дә теге яки бу төбәкнең закон проектларына бәя бирә. Дәүсовет шулай ук чит илләр белән дә элемтәләрне арттыра бара. Соңгы вакытларда гына да Кытай, Төркия, Словакия делегацияләрен кабул иттек. Кыскасы, абруебыз югары.
Фәрит Мөхәммәтшин бишенче чакырылыш Дәүләт Советында кабул ителгән законнарны да санап китте. Аларның иң әһәмиятлеләренең берсе – 2015 елда закон статусын алган Социаль-икътисади үсеш стратегиясе. Без, төбәкләр арасында беренчеләрдән булып, 2030 елга хәтле республикабыз үсешен фаразлап, ягъни “иртәгесен алдан киртәләп” куя алдык. Вәзгыять еш үзгәреп торган бу заманда планлы үсешкә юл алуыбызны әйтү зур кыюлык иде.
Дөньяда көндәшлеккә сәләтле республика булырга омтылышыбызга федераль үзәк тә югары бәя бирде. Инде уйлаганнар барып кына чыксын.
Күп кенә законнарыбызның “социаль йөзле” икәнен әйтеп, Фәрит Мөхәммәтшин 80 яше тулган гражданнарның капиталь ремонт өчен түләүдән азат ителүен, ә 70 яше тулганнарның әлеге кертемнең яртысын гына түләргә тиешлеген искә төшерде.
Өлкәннәргә игътибар өчен рәхмәт, әлбәттә. Тик менә Фәрит әфәндегә журналистлар “Сугыш чоры балалары турында” закон язмышын искә төшерделәр. Мәгълүм булганча, федераль үзәк мондый законны кабул итәргә “кыймый”. Ягъни балачакларын сугыш көйдергән буынга ташламалар ясау, акчалата түләүне үз өстенә аласы килми. Фәрит әфәнде уенча да, Бөек Ватан сугышы илнең аерым төбәкләрендә генә узмады бит, афәт бөтен илгә килде, димәк, “Сугыш чоры балалары турында” закон да федераль дәрәҗәдә кабул ителергә тиеш. Әгәр бу закон өчен федераль бюджеттан акча бирелсә, күпмесендер төбәкләр дә өстәр иде, дигән фикердә парламент рәисе.
Журналист халкы шундый бит инде ул, урынлы-урынсыз сораулар бирергә дә ярата. Безне сентябрьдә узачак сайлау уңаеннан кемнең Дәүсоветка үтәсе, кемнең тышкы якта каласы, парламент комитетлары, парламент рәисе урынбасарлары саны үзгәрәме, юкмы икәне дә кызыксындырды. Дәүләт Советы рәисенең ничек җавап бирәсен дә чамалый идек юкса. Сайлау белән бәйле мәгълүматларны вакытлы-вакытсыз тарату закон нигезендә тыела бит. Ул да, бу хакта сөйләнергә иртәрәк икәнен искә төшереп, бөтен үзгәрешләр яңа парламентта хәл ителәчәк, диде. Гамәлдәге депутатларга һәм аларның эшчәнлеген яктырткан журналистларга да рәхмәт белдерде.
Рәхмәтегез өчен рәхмәт инде.
Риман Гыйлемханов
