Казанда «Ел җитәкчесе-2019» республика конкурсы лауреатларын бүләкләделәр. Тантананың мәртәбәле кунаклары Татарстан Президенты Рөстәм Миңнеханов, Татарстан Дәүләт Киңәшчесе Минтимер Шәймиев, Татарстан Дәүләт Советы Рәисе Фәрит Мөхәммәтшин һәм Татарстан Премьер-министры Алексей Песошин булды.
«Татарстан барлык дәрәҗәдәге бюджетларга һәм бюджеттан тыш фондларга керемнәрне мобилизацияләү буенча Идел буе федераль округында лидер булып тора. Без илебез төбәкләре бишлегендә. Түләүләр күләме 1 трлн сумнан артык тәшкил итте, шуларның 70 проценты — федераль бюджетка кертем. Бу казанышлар — безнең предприятиеләрнең җайга салынган эше нәтиҗәсе һәм компетентлы идарәче кадрлар хезмәте. Бу залдагы барлык җитәкчеләргә һәм сезнең коллективларга фидакяр хезмәтләре өчен рәхмәт белдерәсем килә», — диде сәламләү сүзендә Рөстәм Миңнеханов.
Шуннан соң ул алдынгы җитәкчеләргә дәүләт бүләкләре тапшырды. «Татарстан Республикасы алдындагы казанышлары өчен» ордены белән «ЛУКОЙЛ» ГАҖ вице-президенты, «РИТЭК» ҖЧҖ генераль директоры Николай Николаев бүләкләнде.
«Бу республика территориясендәге безнең кечкенә предприятиенең эшенә бик зур бәя. „ЛУКОЙЛ“ компаниясенең Татарстан территориясендәге потенциалы югары һәм без икътисади һәм финанс күрсәткечләрен үстерүне дәвам итәчәкбез», — диде Николай Николаев бүләкләүдән соң.
- «РИТЭК» компаниясе («ЛУКОЙЛ» төркеменең бүлендек җәмгыяте) — республика нефть сәнәгатенең иң уңышлы предприятиеләре исәбендә. «ТатРИТЭКнефть»нең еллык табыш күләме 1 млн тоннадан артык тәшкил итә. Әлеге күрсәткечләр буенча предприятие Татарстанның кече нефть компанияләре арасында ышанычлы рәвештә алда бара.
«Ел җитәкчесе-2019» конкурсында барлыгы 16 кеше лауреат булды. Алар барысы да Татарстан икътисадының төрле тармакларында һәм өлкәләрендә төп оешмаларны тәкъдим итә. «РИТЭК» ҖЧҖ генераль директоры «Югары социаль җаваплылык өчен» номинациясендә премия белән бүләкләнде.
"Татар-Информ"
