Татарстанда алданган өлешчеләр проблемасы аерым игътибар үзәгендә. 2016–2019 еллар эчендә 3884 өлешче өчен 29 объект тапшырылган. Узган ел Питрәч районының Көек авылындагы, Чаллыдагы алданган өлешчеләрнең проблемалары тулысынча хәл ителгән. Быел Казандагы проблемалы барлык объектларны төзеп бетерергә планлаштыралар.
Татарстан Премьер-министры урынбасары Рөстәм Нигъмәтуллин китергән мәгълүматлар буенча, узган ел бу максатлар өчен республика бюджетыннан 1,3 млрд сумнан артыграк акча бүлеп бирелгән. Өлешчеләргә ярдәм итә торган федераль программада да актив эшләр алып барылган, җиде катлаулы һәм зур объектларда эшләр кабат торгызылган.
Бүген иң катлаулы йортлар Казанда урнашкан. Биредә ун йортны төзү белән проблемалар бар. Ләкин аларын да ел ахырына кадәр төзеп тәмамларга өметләнәләр.
– Пандемия безгә комачаулык итмәде. Төзелештә эшләр бара, – диде Рөстәм Нигъмәтуллин.
Алданган өлешчеләргә Ярдәм итү фонды директоры Иван Новиков әйтүенчә, Россиядә алданган өлешчеләргә дәүләт ярдәме белән фатир бирүне чикләү ихтималы федераль дәрәҗәдә карала.
– Проблемалы объектларны төзеп бетерү өчен бюджет акчасы тотылу сәбәпле, гамәлдәге законга үзгәрешләр кертү һәм өлешчеләргә чикләнгән күләмдә фатир бирү варианты федераль дәрәҗәдә карала, – диде Иван Новиков.
Аның фикеренчә, әлеге мәсьәлә кертемнәрне иминиятләштерү схемасы кебек эшләргә тиеш.
– Билгеле булганча, проблемалы объектларда күп фатирлар күп очракта инвесторларныкы була. Алар – я юридик затлар, я алга таба сату өчен торак алган кешеләр, – диде Иван Новиков.
Төзелеш, архитектура һәм торак-коммуналь хуҗалык министры урынбасары Илшат Гыймаев әйтүенчә, республикада төзелеш мәйданының 41 проценты иске кагыйдәләр буенча төзелә. Бу – 800 мең квадрат метр тирәсе. Калган 59 проценты эскроу-счетлар белән проект финанславы аша төзелә.
Министр урынбасары сүзләренчә, проект финанславыннан башка төзелгән биналар да республика хакимияте контролендә тора.
– Киләчәктә Татарстанда алданган өлешчеләр проблемасы килеп чыкмас, – дип ышандырды ул.
Зөһрә Садыйкова
Ханнанова ЭльмираЛяля Рамазановнанын тортлары хэм ижади унышлары ,кондитер осталыгы Ватаным Татарстан газетасына яналык булып бик лаек язарга!)Кондитер остасы Ләлә Фәйзуллина: «Беренче тортымны 8 яшьтә пешердем»
Загрузка ...
