Түбән Камада яшәүче Нурисә Габдуллина чәүкәләргә бәйле бер кызык видео юллаган. Анда кошлар киптерергә куйган әйберне йолкып, оялары өчен чимал җыялар.
– Чәүкә бераз гына «шопоголик»ка охшаган: ялтыраган әйберне күрсә, үзенеке итәргә ашыга. Шулай берсендә ялтыравыклы яулык кигән идем, ике чәүкә һөҗүм итте. Куганга исләре дә китмәде, башка кунып, яулыкны таркалый башладылар.
Ә бүген иртән менә мондый күренешкә тап булдым: берәү чүплек контейнеры янына иске кием-салым чыгарып куйган. Игътибарымны чәүкә тавышы җәлеп итте. Якынрак килсәм, кошлар пәлтәнең материалын тишеп, эчендәге синтепонны йолкыйлар. Оя корырга менә дигән чимал бит, форсаттан файдаланып калырга телиләрдер, — дип яза Нурисә Габдуллина.
