Татарстанда йөк машинасы һәм автобус катнашында куркыныч юл-транспорт һәлакәтендә дүрт кеше зыян күргән. Аларның берсе — 14 яшьлек яшүсмер, дип хәбәр иттеләр ТР Сәламәтлек саклау министрлыгы матбугат хезмәтендә.
Зыян күрүчеләрнең дүртесе дә Чистай үзәк район хастаханәсенә китерелгән, берсенең халәтен табиблар авыр дип бәяли. Өч кешенең, үсмерне дә кертеп, уртача авырлыктагы хәле.
«Һәлакәт урынында биш ашыгыч ярдәм бригадасы эшләде», — дип билгеләп үттеләр матбугат хезмәтендә.
Мәгълүмат агентлыгы мәгълүматлары буенча, биш һәлак булучының берсе — микроавтобус йөртүче, дүртесе — пассажирлар.
Юл-транспорт һәлакәте бүген иртән, бишенче сәгатьтә, Татарстан Республикасы Чистай муниципаль районында Казан — Оренбург трассасында булды. Шаһитлар сөйләвенчә, Чистай Выселкасы авылыннан ерак түгел Renault микроавтобусы һәм MAN фурасы бәрелешкән.
