Татарстан Президенты Рөстәм Миңнеханов «Армия-2021» халыкара хәрби-техник форумын һәм 2021 елгы армия халыкара уеннарын ачу тантанасында катнашты.
Чарада катнашучыларга сәламләү сүзе белән Россия Президенты Владимир Путин мөрәҗәгать итте. Ул билгеләп үткәнчә, «Патриот» паркында мондый масштаблы һәм әһәмиятле очрашулар инде җиденче тапкыр уза, ул Россия һәм чит ил Кораллы Көчләре вәкилләрен, оборона предприятиеләре, фәнни һәм конструкторлык мәктәпләре җитәкчеләрен берләштерә.
«Быел форумда Россиянең дәүләт оборона заказын үтәүдә катнашучы оборона-сәнәгать комплексы предприятиеләренең һәм оешмаларының 90 проценттан артыгы катнаша. Алар, безнең армия һәм флотны кораллар һәм техника белән тәэмин итүне ышанычлы тәэмин итеп кенә калмыйча, халыкара хезмәттәшлеккә, заманча кораллар эшләү һәм чыгару буенча иң киң кооперациягә дә әзер», — диде дәүләт башлыгы.
Халыкара армия уеннары коралларны һәм хәрби техника мөмкинлекләрен тәкъдир итү өчен нәтиҗәле мәйданчык булып тора. Россия Президенты билгеләп үткәнчә, Уеннар елдан-ел яңа катнашучыларны җәлеп итә, ярыш төрләре арта бара. Бу юлы хәрби хезмәткәрләр 11 ил полигоннарында 34 халыкара конкурста үз осталыкларын күрсәтәчәкләр.
«Форумны һәм армия уеннарын уздыру халыкара хәрби хезмәттәшлек үсешенә, Илебезнең Кораллы Көчләренә, оборона, инновацион сәнәгать тармакларына, фән һәм технологияләр өлкәсенә, тормышларын Россиягә, халкыбызга һәм Ватаныбызга багышларга әзер талантлы яшьләрне җәлеп итәр, дип ышанам», — дип өстәде Владимир Путин.
Форум кысаларында укчылардан алып артиллериягә, танкларга, хәрби авиациягә кадәр 28 меңнән артык заманча корал һәм техника тәкъдим ителгән. Аларның күбесе сыналган һәм хәрби шартларда тикшерү узган.
Рөстәм Миңнеханов күргәзмә экспозицияләрен карап чыкты, Татарстан предприятиеләре стендлары белән танышты. «Россия вертолетлары» холдингының тышкы экспозициясендә Казан вертолетлар заводы (Ростех дәүләт корпорациясенә керә) җитештергән 3 винтлы машина: хәрби-транспорт Ми-17В-5 һәм Ми-38Т һәм премиум-класслы Ансат Aurus вертолеты тәкъдим ителгән.
«Ак Барс Холдинг» мәйданчыгында Татарстан Президентына «Метеор-2020» су асты канатларында пассажирлар теплоходы макетын тәкъдим иттеләр һәм Зеленодольск суднолар төзү заводында гамәлгә ашырыла торган башка проектлар турында сөйләделәр.
Шулай ук Рөстәм Миңнеханов мәгариф учреждениеләренең комплекслы куркынычсызлыгын тәэмин итү буенча яңа техник чаралар белән дә танышты, дип хәбәр итә Президентның матбугат хезмәте.
