Covid-19 инфекциясенә каршы вакцинациядән соң иммунитетны формалаштыру һәр кешенең шәхси һәм төрле, шул исәптән тышкы факторларга бәйле булырга мөмкин. Бу хакта ТАСС агентлыгына функциональ диагностика табибы, «Медскан» терапевты Анна Баранова сөйләде.
Шулай итеп, антитәнчекләр формалаштыруга начар туклану, стресс, экология тә йогынты ясарга мөмкин.
«Вакцинациядән соң антитәнчекләр эшләнү — ул иммун процесс, аның нәтиҗәлелеге төрле факторлар белән хәл ителергә мөмкин, аларның төп өлеше булып кичергән яки хәзерге авыру вакытындагы инфекцияләр, хроник авырулар, стресслар, туклану җитмәү, әйләнә-тирәлекнең начар экологиясе һәм башкалар тора», — дип сөйләде Баранова.
Ул аңлатканча, һәр кешенең иммун процессы индивидуаль, шуңа күрә прививкадан соң эшләнгән антитәнчекләрнең төрле дәрәҗәсе күзәтелә.
Баранова сүзләренчә, авитаминоз шулай ук вакцинага иммун реакцияне йомшартырга мөмкин. Вакцинациядән максималь яхшы нәтиҗәләр булсын өчен, инъекция алдыннан кечкенә генә тикшерү — гомуми кан анализы, Д витамины анализы узарга мөмкин.
«Әгәр хроник авырулар бар икән, аларның чагылышын комплекслы бәяләргә, кан анализлары буенча организмның торышын тикшерергә кирәк», — дип йомгак ясады Баранова.
