Кытайның China Eastern авиакомпаниясенең һәлакәткә юлыккан Boeing 737 самолетында чит ил гражданнары булмаган. Бу хакта Кытай үзәк телевидениесе хәбәр иткән, дип яза “РИА-Новости”.
Куньмин шәһәреннән Гуанчжуога очучы самолетның һәлакәткә юлыгуы сәбәпле, China Eastern Airlines авиакомпаниясе Boeing 737−800 самолетларыннан вакытлыча файдаланмаска карар иткән. Һавадагы авиалайнерлар, рейсларын төгәлләгәннән соң, вакытлыча очмаячак, дип билгеләп үтелгән агентлык хәбәрендә.
Исегезгә төшерәбез: Кытай самолетының һәлакәткә юлыгуы турында хәбәр бүген иртән таралды. Лайнерда 132 кеше – 123 пассажир һәм 9 экипаж әгъзасы булган. Һәлак булучылар турында әлегәчә төгәл генә мәгълүмат юк.
