«Кара пулат» операсы Тинчурин театры сәхнәсенә кайта

18-22 майда – биш көн дәвамында Тинчурин театры сәхнәсендә композитор Элмир Низамовның «Кара пулат» операсы куелачак. Музыкаль әсәрнең сәхнәгә кайтуы ислам динен кабул итүгең 1100 еллыгына багышлана. Бу хакта Тинчурин театрының матбугат хезмәте хәбәр итә.

Проектның продюсеры, Тинчурин театры директоры, Татарстанның атказанган мәдәният хезмәткәре Фәнис Мөсәгыйтов сүзләренчә, “Кара пулат” операсы Татарстанның мәдәни тормышында зур вакыйга гына булып калмыйча, ислам динен кабул итүгә багышланган чараларга килгән чит ил кунакларына татар тарихы, музыкасы, әдәбияты белән танышуга мөмкинлек тудыра.

«Опера-риваять Тинчурин театры сәхнәсендә 2015 елда уңышлы куелды. Татар операсын Казан, Мәскәү тамашачылары яратып кабул итте. Татарстанның тарихи һәм мәдәни традицияләрен күрсәткән әлеге әсәрнең сәхнәгә кайтуы татар сәнгате үсешенә үз өлешен кертер” -, диде Фәнис Мөсәгыйтов.

“Кара пулат”ның композиторы Элмир Низамов туган ил, батырлык, тугрылык турындагы әсәрнең аның өчен аеруча якын булуын яшерми.
«7 елдан соң “Кара пулат”ның данлыклы Тинчурин сәхнәсенә кайтуына аеруча шатмын. Сәхнәдә 2015 елгы куелышта катнашкан артистларны да, яшь талантларны да күреп булачак. Театрның Ильяс Камал җитәкчелегендәге оркестры турында аерым әйтеп узасым килә. 2015 елда операны куйганда театрның андый дәрәҗәдәге оркестры юк иде әле. Ә хәзер Тинчурин театрын Ильяс Камал җитәкчелегендәге оркестрдан башка күз алдына китереп булмый. Мин операны тамашачылар яратып кабул итәр дип ышанам”, — диде Элмир Низамов.

Тинчурин театры оркестрының сәнгать җитәкчесе, баш дирижер Ильяс Камал әсәр авторларына, кую процессында катнашкан һәр кешегә, җитәкчеләргә зур рәхмәтен белдерә.

Операда төп рольләрне Илүсә Хуҗина, Артур Исламов, Илгиз Мөхетдинов, Денис Ханбаба башкара. Шулай ук спектакльдә Элина Сафина, Диана Медведева, Эльвира Калисләмова, Әнисә Вәлиева, Полина Зиннәтова, Олжас Меирманов, Динар Шәрәфетдинов, Дмитрий Дорофеев, Леонид Тимашев, Айдар Мөхәмәтдинов һәм башкалар башкара. «Кара пулат»та Тинчурин театры артистлары Зөфәр Харисов, Зөлфәт Закиров, Илнур Байназаров та чыгыш ясый.

Либретто авторы – Татарстанның халык шагыйре Ренат Харис, режиссеры – Россиянең атказанган сәнгать эшлеклесе, Татарстанның халык артисты Георгий Ковтун, рәссамы – Владимир Самохин. Операның нигезендә Аксак Тимер гаскәрләре тарафыннан яндырылган унике кыз турындагы риваять ята.

“Кара пулат”та төп рольне башкаручы Татарстанның атказанган артисты Илүсә Хуҗина әсәрнең яңадан сәхнәгә кайтуы татар опера сәнгатен үстерүгә өлеш кертәчәк, дип саный.

“Кызганыч, татарча опера әсәрләре куюга тиешенчә игътибар бирелми һәм “Кара пулат”ның яңартылуы бу мәсьәләне хәл итүгә күпмедер ярдәм итәчәк”, — дип сөйләде Илүсә Хуҗина.