Россия Хөкүмәте рәисе Михаил Мишустин урынбасары Марат Хөснуллинны якындагы биш елда гамәлгә ашырачак «Төзелеш» дәүләт программасы кураторы итеп билгеләде. Бу хакта Министрлар Кабинеты матбугат хезмәте хәбәр итә.
Эшләр 2023 елның 1 гыйнварыннан башлана, дип искәртелә. Җаваплы оешма — Төзелеш министрлыгы.
Моннан тыш, Мишустин вице-премьер Александр Новакка РФ Президенты Владимир Путин йөкләмәсе буенча 2035 елга кадәр расланган «Энергияне сак тоту һәм энергетика нәтиҗәлелеген арттыру» дәүләт программасын гамәлгә ашыру барышын контрольдә тотарга кушты.
