Бүген Татарстан Президенты Рөстәм Миңнеханов Казанда «Протек» компаниясенең логистика үзәге эшенә старт бирде.
«Барлык кыенлыкларга да карамастан, 2019 елда без фикер алышкан проектның тәмамлануына мин бик шат. Фармацевтика, икмәк кибете кебек үк, һәр көнне кирәк. Һәм сатып алучыларга шундый зур күләмдә продукция сатып алуны якынайту «Протек» компанияләр төркеменең республикага ышанычы турында сөйли», — диде Рөстәм Миңнеханов.
Аның сүзләренчә, логистика үзәге карап торышка модульле складны хәтерләтә. «Чынлыкта бу катлаулы махсус инженер конструкциясе, ул дарулар белән тәэмин итү буенча бурычларны хәл итә. Безнең бурыч — кешеләрнең тормыш сыйфатын яхшырту. Әмма иң мөһиме — аларның сәламәтлеге. Безне барлык кирәкле препаратлар белән тәэмин итсәләр, сәламәтлек булачак», — дип искәртте ул.
«Протек» компаниясе президенты Вадим Музяев Татарстан Республикасында логистик үзәк ачу — компаниянең инфраструктура үсеше стратегиясенең бер өлеше булуын әйтте.
«Казан — якын-тирә төбәкләрне тәэмин итү һәм клиентлар базасын үстерү ягыннан безнең компания мөмкинлекләрен тормышка ашыру өчен перспективалы локация: шәһәр тотрыклы демографик үсеш һәм халыкның сатып алу сәләте белән аерылып тора. Логистик үзәк ачылу белән республика һәм якын-тирә төбәкләрдә яшәүчеләргә даруханә ассортиментын киңрәк тәкъдим итеп булачак», — диде Музяев.
Логистик үзәктә дарулар, БАДлар һәм медицина әйберләре сакланачак, алар соңыннан кулланучыларга җибәрелә. Үзәк мәйданы — 15 мең квадрат метр, шул исәптән склад мәйданы 12 мең квадрат метр. Базада бер үк вакытта 11 мең берәмлеккә якын товар саклана ала, шуларның 60 проценты — дару чаралары. Киләсе елда ассортиментны 20 мең позициягә кадәр арттыру көтелә.
Фаразларга караганда, Татарстан, Чувашстан, Марий Эл, Удмуртия, Коми, Киров өлкәсе һәм Пермь крае логоүзәк клиентлары булачак.
Логоүзәктә беренче этапта 120 эш урыны булдырылачак. 2023 елда 50гә якын яңа вакансия ачылыр дип планлаштырыла.
