Кичә кич Тукай районы Кече Шилнә авылында кинәт чыккан давыл, абзарның түбәсен каерып, икенче бер йорт янына очырткан. Әле ярый, беркемгә дә зыян килмәгән, дип яза “Челнинские Известия”. Ә Зур Шилнә авылында, ут баганасы авып, койманы җимергән.
Давыллы яңгыр Чаллы тирәсендәге бакчачылык ширкәтләренә дә кагылып узган. “Весна-2”, “Бриз”, “Прибрежный” һ.б. ширкәтләрендәге бакчалар байтак кына зыян күргән: җимеш агачлары сынган, чәчәк клумбалары, түтәлләр су эчендә калган.
“Давыл бөтен алма һәм грушаларны җиргә коеп төшерде. Җил-яңгыр гына түгел, боз да яуды”, –– дип язган социаль челтәрләргә “Бриз” бакчачысы.
Гарасат вакытында кайбер бакчачыларның көнкүреш техникасын: телевизор һәм суыткычларын яшен суккан.
