Екатеринбургта хатын-кыз бер сәүдә үзәгенең ашый торган мәйданында 300 мең сумга 7 яшьлек улын саткан. Сәбәбе-бурычлар күп булу.
Бу хакта «Альтернатива» кешеләр сату белән көрәшүче оешма хәбәр итте. Нәкъ менә алар яшерен сатып алучы белән элемтәгә кереп, Нәргизә исемле хатын-кызны тоткарлый. Язышканда ул үзенең беренче никахтан булган 7 яшьлек баласын 300 мең сумга сатарга теләвен әйтә.
Соңрак яшерен сатып алучы җирле сәүдә үзәгенең берсендә Нәргизә белән очрашу турында килешкән. Килешү көнендә гадәти киемнән булган полиция хезмәткәрләре килешенгән урынга килә. Соңгы вакытка кадәр Хокук саклаучылар бу хәлгә ышанмый. Тик, чыннан да, хатын-кыз бала белән билгеләнгән урынга килгән. Шулай ук ул бала документлары белән тулы бер папканы да алган була.
Сүз уңаеннан, әнисе улын кемгә сатуы белән кызыксынмаган. Кыска гына әңгәмәдән соң ул 300 мең сум акча алу турында язып, имзасын куя һәм баланы «сатып алучыга»тапшыра. Бу вакытта хатын-кызны тоткарлыйлар.
Полиция бүлегенә хатын-кызның ире килә, ул хатынының планнары турында белмәвен әйтә. Шулай ук ул полиграф үтәргә ризалаша.
