Татарстан Урман хуҗалыгы министрлыгында “Экология” илкүләм проектының “Татарстан Республикасында урманнарны саклау” төбәк проекты кысасында урман питомникларында күпме агач-куак кәлшәсе үстерелүен барлаганнар. Урман хуҗалыгы министры Равил Кузюров әйтүенчә, үсентеләрнең саны, сыйфаты, гамәлдәге стандартлар һәм техник шартларга туры килү-килмәве тикшерелгән.
Аның әйтүенчә, 2022 елда барлыгы 33,9 миллион, шул исәптән Татарстан Урман селекция-орлыкчылык үзәгендә – чүлмәккә утыртып, 12 миллион үсенте әзерләнгән. Шуның 25,5 миллионы – ылыслы, 7,9 миллионы – яфраклы агач, 0,5 миллионы – куак кәлшәсе.
“Агач-куак кәлшәләре үстерү “Татарстан Республикасында урманнарны саклау” төбәк проектының өстәмә күрсәткече булып тора, – ди Равил Кузюров. – Быел план 10%ка арттырып үтәлде. Үсентеләрдән 2023 елда урманнарны яңарту, саклагыч полосалар булдыру өчен файдаланылачак”.
