Газинур Гайнетдинов: «Авыл хуҗалыгын кирәкле итәргә телим»

Бүгенге кунагыбыз – «Яшь профессионаллар» (WorldSkills Russia) илкүләм чемпионатында икенче урын яулап, Татарстан данын таныткан Сарман районының Әлмәт авылы егете Газинур Гайнетдинов. Кечкенәдән техника «җен»е кагылган егет киләчәген авыл хуҗалыгы белән бәйләргә тели.

Кунагыбыз турында белешмә

• Газинурга – 18 яшь.

• Ул Сарман аграр көллиятенең 3 нче курсында укый.

• «Яшь профессионаллар» (WorldSkills Russia) илкүләм чемпионатында икенче урын алган.

• Шәхси эшмәкәр булырга хыяллана.

– Газинур, техника белән мавыгуың кайчаннан башланды?

– Мәктәптә укыган вакытта ук үзем двигательләрне сүтеп җыя идем инде. Әтием мине кечкенәдән һәрвакыт үзе белән ияртеп йөрде, техника серләренә төшендерде, бар эшкә ул өйрәтте. Моның өчен бик зур рәхмәт аңа.

– WorldSkills чемпионатына ничек килеп эләктең?

– Чемпионат турында ишеткәнем бар иде. Мине, сәләтең бар, техниканы яхшы беләсең, дип катнашырга кыстадылар. Башта көллияттә узган ярышларда катнаштым. Аларда җиңгәннән соң, республика күләмендә беренчелекне яуладым. Аннан Мордовиянең Саранск шәһәрендә узган финал ярышларында Татарстан данын яклап чыгыш ясадым. «Авыл хуҗалыгы машиналарын эксплуатацияләү» компетенциясендә икенче урынга лаек булдым.

– Ярышта ниндирәк биремнәр булды?

– Кыска вакыт эчендә техниканың төзексез җирләрен табып көйләү, аны эшләтеп җибәрү, техник хезмәт күрсәтү кебек биремнәр булды. Остазларыма, укытучыларыма бик зур рәхмәт. Минем җиңүемдә аларның өлеше зур.

– Катнашучылар арасында иң яше дә бит әле син. Үзеңнән зурраклар белән көч сынашырга авыр булмадымы?

– Әйе, көндәшләрем миннән 2–3 яшькә олырак иде. Шуңа ярыш та җиңелләрдән булмады. Төрле шартларда эшләргә туры килде. Тик шулай да, мин үз эшемне төгәл һәм тиз итеп башкарып, республикада – беренчелекне, ил буенча икенче урынны яулый алдым. Әзерлек һәм тренировкаларга йөрү үз нәтиҗәсен күрсәтте.

– Республикада уздырылган күп бәйгеләрдә даими катнашасың. Алар нинди мөмкинлекләр ача?

– Төрле бәйгеләрдә катнашу, көчемне сынап карау киләчәктә үземә файда китерер дип уйлыйм. Алар миңа күп мөмкинлекләр ача, киләчәккә юл сала. Әйтик, мине хәзер Казан дәүләт аграр университетына бушлай укырга чакыралар.

– Алга таба нинди планнарың бар? Үзеңне киләчәктә кем итеп күрәсең?

– Алла боерса, көллиятне бетергәч, аграр университетына укырга керергә ниятем бар. Киләчәктә шәхси эшмәкәр буласым килә. Эшемне авыл хуҗалыгы, техникасы белән бәйләргә уйлыйм. Авыл хуҗалыгында хезмәт куярга, аны күтәреп, кирәкле итәргә телим.

Әңгәмәдәш – Ләйсән Сафина