Тормышта барысы да гаилә тәрбиясенә бәйле. Гаилә – төп кыйммәт. Татарстан Дәүләт Советы һәм Идел буе федераль округы төбәкләренең хатын-кыз депутатлары стратегик сессиясе утырышында төп фикер әнә шул булды.
Хатын-кыз депутатлар «Бердәм Россия» партиясенең «Халык программасы»н тормышка ашыру буенча үз тәкъдимнәре белән уртаклашырга җыелды. Татарстан Дәүләт Советындагы хатын-кыз депутатларның «Мәрхәмәт –Милосердие» берләшмәсе җитәкчесе Алсу Нәбиева билгеләп үткәнчә, стратегик сессия эшендә федераль округның 13 төбәгендәге 400дән артык депутат катнашкан. Алардан законнар һәм башка документларга үзгәреш кертү буенча 110 тәкъдим кабул ителгән.
Дәүләт Советы Рәисе Фәрит Мөхәммәтшин әйтүенчә, хатын-кыз депутатлар, берләшеп, гаиләне, аналарны һәм балаларны яклау, социаль яклау, патриотик тәрбия бирү кебек бик актуаль мәсьәләләрне күтәрә, ә болар – җәмгыятебезнең төп кыйммәтләре.
– Сез – безнең таянычыбыз, кайчакта хатын-кыз депутатларны яхшырак та ишетәләр. Кайгырту, киләчәк буынның иминлеге, җаваплылык – болар барысы да хатын-кыз җилкәсендә. Ил һәм дөнья өчен катлаулы булган чорда сезнең эшчәнлек аеруча әһәмияткә һәм кыйммәткә ия, – диде ул. – Без гаиләләр таркалганга борчылабыз. Бала тулы булмаган гаиләдә яшәргә мәҗбүр кала. Иң куркынычы: хәзерге балалар смартфон, интернет дөньясы, татуировкалар ясату модасы, ЛГБТ пропагандасы басымы астында яши. Алар өчен теләсә нинди мәгълүмат ачык. Моның нәтиҗәсе аяныч булырга мөмкин. Безгә ят булган күренешләрне, дөньяга карашларны тормышыбызга кертмәс өчен, чаралар күрергә кирәк.
Хатын-кыз депутатлар алдында хәл итәсе мәсьәләләр байтак. Икенчел торак базарында торак сатып алганда ташламалы «Гаилә ипотекасы»н федераль дәрәҗәдә гамәлгә кертү, инвалид балаларны белем бирү оешмаларында ике мәртәбә түләүсез ашатуны тәэмин итү, сирәк очрый торган авырулардан препаратлар табу шулар арасында.
Тагын бер борчыган мәсьәлә – ятим балаларны торак белән тәэмин итү. Дәүләт Думасы депутаты Татьяна Ларионова сүзләренчә, Татарстанда ике ел эчендә чиратны бетерү планлаштырыла. Әмма бу мәсьәләдә хәлләр катлаулы булган төбәкләр дә бар. Татьяна Ларионова балалар хокукларын яклау, ятим балаларны һәм ата-ана игътибарыннан мәхрүм калган балаларга белем бирү мәсьәләләренә дә игътибарны арттырырга кирәклеген әйтте.
– Бу категория балалар өчен белем – мөстәкыйль тормышка юл, аның уңышлы булачагына зур өмет бирә, – диде депутат.
Ләйсән Сафина
Телеграмда безнең каналга кушылыгыз: https://t.me/vatantat