Марсель Әхмәдуллин: «Булган бәхетнең кадерен белмибез»

Хәләл мәҗлесләр алып баручы, журналист Марсель Әхмәдуллинның гаиләсендә күңелсез хәл булган. Уйламаган җирдән уллары Мансур авырып киткән. Марсель бу хакта үзенең социаль челтәрендәге сәхифәсенә язып куйган. Шөкер итә белмибез, дигән ул.

– Булган бәхетнең кадерен белмибез дә инде. Ул баш әйләндергеч уңыш, зур байлык булып түгел, ә тыйнак кына, мыштым гына бер «ярыйсы», «бер көе» булып яныбызда булган. Хәтта бер «эчпошыргыч» «ярыйсы» булып: әле тегесе «нитак», әле монысы «нито». Бәхеткә бик тиз ияләшә кеше.

Әле кичә шундый бәхетле булганбыз икән бит! Ә шөкер итүче булдымы? Шушы бөтенлек һәм иминлек өчен рәхмәт әйтүче бар идеме? Шуңа бер теләгем бар: «Әлхәмдулилләх!» – дип әйт әле бер. Тормыш бик тотрыксыз. Уалырга гына тора, – ди ул. – Мансур эче авыртуга зарлана башлады. Артык игътибар бирмәдек башта, тышка чыга алмау сәбәпледер, дидек. Кичен ДРКБга барырга кирәк дигән карарга килдек. Анализ алдылар, рентген ясадылар. Түбән гемоглобиннан һәм эче катудан башка берни юк. Клизма ясаттык та кайтып киттек.

Икенче көнне дә балага хәл кермәде. Кабаттан ДРКБга киттек. УЗИ ясадылар…

Аяз көнне яшен сукты. Эчәклек белән тире арасына кан җыелган. Шул турыда бер шеше дә бар… Соңгы сүзе әнисен аяктан егарлык булды. Бу сүзне ул тормышында икенче тапкыр ишетә инде…

Ашыгыч рәвештә реанимациягә салдылар. Гемоглобин – 56. Тикшеренүләр ясап та теге шешнең нәрсә икәнен аңлый алмыйлар. Аяк астында җир югала.

Тәһәҗҗүдтә бик күптән елаган булмаган.

Корырак язарга тырышам. Юеш күп булды.

Операция нәтиҗәсендә 600 граммга якын кан җыеп алдылар. Ә теге шеш … гематома булып чыкты. Әлхәмдүлилләһ!

Баксаң, моннан 4–5 көн элек уллары тумбочкага менеп, егылып төшкән булган икән.

Эче белән тумбочка кырыена бәрелгән. Баланы юатканнар да, бар да онытылган. Кан савып, гематома барлыкка килгән икән.

Шөкер, сабыйның хәле әкренләп уңайланып килә.

– Балаларыгызны йокларга яткырганда, баш очыннан үбеп алганнан соң, «әлхәмдулилләһ» дип әйтегез әле. Аллаһы Тәгалә сезгә биргән нигъмәтләрне санап чыгыгыз да, санына барыбер чыга алмасагыз да, шөкер намазы укып алсагыз да ярый. Ул нигъмәтләрнең сездә тагын күпме вакыт буласын беркем белми бит, – ди Марсель.