Бүген Санкт – Петербургта «Россия-Африка» икътисадый форумы кысаларында Татарстан Рәисе Рөстәм Миңнеханов Ангола Республикасы Тышкы эшләр министры Антониу Тете белән очрашты. Бу хакта Рәиснең матбугат хезмәте хәбәр итә.
Кунакны сәламләп, Рөстәм Миңнеханов «Россия — Африка» икенче саммиты кысаларында шәхсән очрашуга шат булуын билгеләп үтте.
«Россия өчен Африка — мөһим тышкы сәясәт һәм тышкы икътисади партнер, аның белән хезмәттәшлек итү барлык өлкәләрдә дә активрак үсеш таләп итә. Без Татарстанның Ангола белән дуслык мөнәсәбәтләре кысаларында хезмәттәшлекне җайга салу мөмкинлеген югары бәялибез»,-дип ассызыклады ул.
Россиянең Африка илләре белән мөнәсәбәтләре һәрвакыт җылы булып калды һәм конструктив юнәлештә үсеш алды, дип билгеләп үтте Рөстәм Миңнеханов һәм 2019 елның августында Ангола Президенты Жоау Мануэл Гонсалвеш Лоуренсуның Сочида Россия – Африка беренче саммитында катнашуын искәртте.
«Татарстан үз дәрәҗәсендә Россия-Ангола мөнәсәбәтләрен ныгытуга ярдәм итәргә әзер, — дип белдерде Рөстәм Миңнеханов. — Республикабызның Ангола белән хезмәттәшлеге әлегә киң түгел. Төрле вакытта Анголага Татарстанда җитештерелгән зур йөк автомобильләре китерелеп торды. Сезнең ил — Нигериядән кала, Африкада иң зур нефть җитештерүче. Без бу юнәлеш буенча үзара эш итү мөмкинлекләрен карый алыр идек».
Гомумән алганда, Рөстәм Миңнеханов фикеренчә, нефть эшкәртү һәм нефть химиясе, энергетика, машина төзелеше, автомобиль төзелеше һәм аларга компонентлар җитештерү, IT һәм башка югары технологияләр, медицина һәм фармацевтика, АСК һ. б. өлкәләрдә Ангола компанияләре белән элемтәләрне үстерү өчен зур потенциал бар.
Татарстан Рәисе шулай ук билгеләп үткәнчә, Россия Федерациясендә хезмәттәшлеккә әзер булган кызыклы индустриаль үзәкләр, эре сәнәгать үсеш алган төбәкләр күп. Ул кыскача «Россия — Ислам дөньясы» халыкара икътисадый форумы турында сөйләде. «KazanForum» киләсе елда булачак һәм анда катнашырга чакырды.
Ангола Республикасы Тышкы эшләр министры Антониу Тете Татарстанның, Россия төбәкләренең берсе буларак, сәнәгать потенциалын өйрәнү белән кызыксынуын белдерде. Аның сүзләренчә, углеводород чималын разведкалау һәм чыгару кебек тармакларда хезмәттәшлекне үстерүгә кызыксыну бар, бигрәк тә Татарстанның бу өлкәдә җитди тәҗрибәсе бар. Ул билгеләп үткәнчә, бүген Ангола — Африкада нефть чыгару буенча иң зур илләрнең берсе, әмма төп өлешен экспортка җибәрә. «Сезнең нефть эшкәртү тәҗрибәгез безгә кызыклы, — диде ул. — Хәзер берничә яңа нефть эшкәртү производствосы ачылды, бу безнең өчен отышлы. Без нефть чыгаруның нәтиҗәлелеген дә, аны эшкәртүнең сыйфатын да арттырырга телибез.
Анголаның Тышкы эшләр министры игътибарны җәлеп иткән тагын бер юнәлеш – авыл хуҗалыгын үстерү, АСК өлкәсендә хезмәттәшлек итү. Африка илләрендә, шул исәптән Анголада да, азык-төлек иминлеге, ил эчендә азык-төлек җитештерү өстенлек ала. Аның сүзләренчә, бүген белгечләрне укыту һәм студентлар санын арттыру ихтыяҗы бар – бигрәк тә техник һәм инженерлык белгечлекләре, авыл хуҗалыгы белгечлекләре.
Рөстәм Миңнеханов очрашу барышында, Татарстанның чыннан да углеводородлар чыгару һәм эшкәртү буенча зур тәҗрибәсе бар, дип белдерде. Ул искәрткәнчә, бүген төбәктә чималны эшкәртү тирәнлеге 99%ка кадәр булган җитештерүләр бар.
Квалификацияле белгечләр әзерләүгә килгәндә, Татарстанда шулай ук чит ил студентлары уңышлы белем алучы күп санлы югары уку йортлары бар, дип билгеләп үтте Рөстәм Миңнеханов.
«Бездә ике як өчен дә файдалы хезмәттәшлек өчен күп нокталар бар», — диде Рөстәм Миңнеханов очрашу ахырында.
