Алар арасында өч бала.
Махачкаланың төньягындагы «Нафта-24» ягулык салу станциясендә шартлауда һәлак булганнар саны 27гә кадәр арткан, алар арасында өч бала да бар. Бу хакта дагестанның һәлакәтләр медицинасы үзәгендә хәбәр иттеләр.
Дагестанга килгән Россия Сәламәтлек саклау министрлыгы башлыгының беренче урынбасары Виктор Фисенко зыян күрүчеләр саны 66 кешегә кадәр арткан, шуларның унысы авыр хәлдә дип белдерде.
Исегезгә төшерәбез, шартлау 22:00 сәгатьтә булган. Гадәттән тыш хәлләр министрлыгы мәгълүматлары буенча, башта автосервис бинасы янган, аннары ут ягулык салу станциясенә күчкән, ә аннары АЗСта газ-һава катнашмасы шартлаган. Янгын шартлаудан соң дүрт сәгатьтән соң сүндерелә.
