Ел саен язгы ташу вакытында Буа районындагы Бәбки халкының тормышы икегә бүленә. Күперне су баскач, алар аерым утрау булып яши башлый. Быел авыл кешеләренең фаразлары башкача.
— Зөя елгасында су көннән-көн арта, — ди Килдураз авыл җирлеге башлыгы Зөлфәт Әхәтов.
Бәбки авылында 20дән артык йорт исәпләнә, хәзерге вакытта нибары өч өйдә биш кеше гомер кичерә. Шуларның берсе — Равия әби белән Алик бабай Кәримовлар. Алар 32 ел элек Үзбәкстаннан күченеп кайткан. Хатыны — шушы авылныкы.
— Сыерчыклар күренми. Сыерчыгы да, аларга оя ясаучы кешесе дә калмады инде. Авылда хәлләр шулайрак, — ди 84 яшьлек Алик Кәримов.
Аларның ташуга исләре китми. Ярмасын, кыяр-помидорын, тәм-томны алдан хәстәрләп куйган чөнки. Шуңа күрә ашау буенча проблема юк.
— Кар күп яуса, мамык уңа, диләр безнең якта. Быел ул җиргә сеңеп бара. Бакчада кар калмады да инде. Тау битләрендәгесе дә эреп бетте. Башка вакытта агып төшә иде. Хәзер коп-коры. Елгада су арткан үзе, әмма аның безгә зыяны тими. Яз тыныч кына үтәр дип өметләнәбез, — ди Алик Кәримов.
