Россия Премьер-министры Михаил Мишустин Бөтендөнья сәламәтлек саклау оешмасының хәтта чикләү чараларын алганнан соң да курортларга барырга киңәш итмәвен искә төшерде, дип яза “Интерфакс”.
Ул шулай ук Россия халкын чит илләргә ялга бармаска өндәгән. Аның әйтүенчә, Россиягә башка илләрдән коронавирус “ташымас” өчен шулай кирәк.
“Чит илләрдә эпидемиологик хәлләр төрле җирдә – төрлечә. Ял итүчеләргә вирустан саклануны берничек тә гарантияләп булмый”, – дигән ул.
Мишустин COVID-19 таралуга каршы көрәштә кайбер уңышларны билгеләп үткән һәм коронавирус инфекциясенең илгә чит дәүләтләрдән “кайтуын” искә төшергән.
Премьер шулай ук, үз иленә әйләнеп кайткач, сәяхәтчеләрнең нинди авырлыклар алдында калырга мөмкин булулары турында сөйләп үткән.
Аның әйтүенчә, ялны Россиядә үткәрү күпкә куркынычсызрак булачак. Моннан тыш 1 июньнән башлап, медицина лицензиясенә ия булган шифаханәләр эшли башлаячак. Соңыннарак курортлар да тулы көченә эшкә керешергә мөмкин.
