2020 елның 18 июнендә Татарстанның дәүләтчелек тарихы музеенда ТАССР Хәрби комиссариатының беренче бүлек башлыгы ярдәмчесе булып эшләгән Павлов Иван Николаевичның шәхси документларын архивка тапшыру һәм килешүгә кул кую буенча тантаналы чара булып узды.
Аның документлары архив хезмәткәрләренә Дәүләт Думасының җиденче чакырылыш Депутаты Ольга Павлова тарафыннан тапшырылдылар.
Тантаналы чарада Павловның кызы, Дәүләт Думасының җиденче чакырылыш Депутаты, Дәүләт Думасының хезмәт, социаль сәясәт һәм ветераннар эшләре буенча комитет әгъзасы Ольга Павлова, Татарстан Республикасы Дәүләт Советының алтынчы чакырылыш депутаты һәм секретаре Лилия Маврина, Татарстан Республикасы архив эше буенча дәүләт комитеты рәисе Гөлнара Габдрахманова, Татарстан Республикасы Хәрби комиссарының урынбасары Владимир Любченко, дәүләт архивы директоры Илдар Шафиков, шулай ук Байкиев исемендәге Саба муниципаль районының Икшермә кадет мәктәбе укучылары катнашты.
Архив эше буенча дәүләт комитеты рәисе Габдрахманова Гөлнара Зәкәрия кызы үзенең чыгышында әлеге документларның кыйммәтен ассызыклады. Аларны күргәзмә эшчәнлегендә, батырлык дәресләре үткәргәндә һәм укучыларга хәрби-патриотик тәрбия чаралары уздырганда кулланылачагы турында белдерде.
Дәүләт Думасы Депутаты Ольга Павлова чиратында әтисенең тормышы турында сөйләде. Кадет мәктәбе укучылары И.Павловның янгын вакытындагы батырлыгы турындагы хикәяне зур кызыксыну белән тыңладылар. Моның өчен аны медаль белән дә бүләкләгәннәр. Шулай ук ул кадет мәктәбе укучыларына рәхмәт хатлары һәм кул сәгатьләре тапшырды.
Чарада И.Павловның дуслары һәм аның белән бергә хезмәт иткән кешеләр чыгыш ясады. Хәрби комиссар урынбасары Любченко Владимир Николай улы тантанада катнашучыларга И.Павловның хәрби комиссариатта яшь буын вәкилләренә хәрби-патриотик тәрбия өлкәсендәге эшчәнлеге турында сөйләде. Шулай ук ул аның шәхес буларак һәм эштәге уңай сыйфатларына аерым тукталды.
Чара ахырында кадет мәктәбе укучылары музыкаль номер белән чыгыш ясадылар.
Чара барышында катнашучылар ИПавловның тормыш һәм хезмәт юлы турындагы документлар буенча оештырылган күргәзмә белән таныштылар.
