Уңган, булган кызлар! Американың иң кояшлы штатында яшәүче татар кызлары турында әнә шулай дип әйтергә мөмкин. Үзенчәлекле милли татар ризыклары пешерү дисеңме, татар рәссамнарының картиналарын фотосурәтләүме – барысын да булдыралар! Кызларның Америкага ничек күчеп китүләре һәм андагы тормыш турында аларның үзләреннән сорадык.
Римма Минһаҗева, тумышы белән Мөслимнән:
– Америкага 2009 елның маенда туристик виза буенча киттем. Мәктәптә укыганда ук чит ил язучыларының китапларын укый идем һәм кайчан да булса чит илгә китәрмен дип уйлый идем. АКШ бер яктан серле булып тоелды, шул ук вакытта үзенә җәлеп итте.
Дизайн һәм бизәү өлкәсендә кызыксынуларым күп, шуңа күрә мин үземдә еш кына яңа сәләтләр ачам. Мин бизәнү әйберләрен дизайнлау белән бик яратып шөгыльләнәм, десертлар әзерлим.
Бүген мин – Көньяк Флоридадагы татар чараларын оештыручы. Дусларым арасында татарлар саны арта башлагач, табигатьтә чара оештырырга булдым. Бу 2013 ел иде һәм шул елның декабреннән Facebookта «Флорида татарлары» төркемен булдырдым.
2015 елның 21 мартында без беренче тапкыр Сабантуй үткәрдек. Төрле штатлардан, Флориданың үзеннән кунаклар бар иде. Соңрак башка илләрдән, шулай ук Россиядән һәм Татарстаннан да кушыла башладылар.
Безнең Сабантуй Татарстандагы кебек үк түгел – монда без белмәгән кешеләр белән зур бер гаилә булып, туганнар белән туйда җыелышкан кебек бәйрәм итәбез.
Биредә дусларым күп, Флоридада яшәүче татар кызлары белән бик актив аралашабыз, кызыклы идеяләр һәм тәкъдимнәр белән уртаклашабыз. Карантин вакытында өйдә утырып ялыккач, кызлар белән милли татар ризыклары пешерү буенча челлендж ясарга булдык. Социаль челтәрләрдә дә әлеге идеябезне бик ошаттылар.
Кызлар миңа декорацияләү һәм десертлар ясау буенча остаханәләр үткәрергә тәкъдим итә, бәлки тиздән анысын да тормышка ашырырбыз.
Туган ягыма сирәк, әмма бик теләп кайтам. Әти-әниемне, дусларымны, туганнарымны, Мөслимнең табигатен бик сагынам. Ә Флорида минем өчен кадерле, яраткан, җылы шәһәр һәм мин үземнең бүтән җирдә яшәвемне хәзер күз алдына да китерә алмыйм.
Диләрә Галиева, 33 яшь, тумышы белән Бөгелмәдән:
– Казан педагогика институтында укыганда, күп кенә төркемдәшләрем Work & Travel программасы буенча чит илгә укырга китте. Анда алар сәяхәт итә, инглиз телен өйрәнә һәм акча эшли башлагач, миндә дә шундый теләк туды. Шулай итеп диплом яклагач, төркемдәшләрем белән Америкага китәргә булдык. Мин диплом яклап йөргән вакытта, дусларым имтиханнарын биреп, 1 ай алдан китеп, Чикаго шәһәрендә урнашканнар иде инде. Тиздән мин дә аларга кушылдым һәм шулай итеп, Америка яулауны Чикаго шәһәреннән башладым.
Миндә беркайчан да «Америкага яшәргә китәм» дигән уй юк иде, шулай килеп чыкканын үзем дә сизми калдым. Әти-әниләрем дә моңа каршы булмады.
Америкага килгәч, күптөрле һөнәрләрне сынап карадым. Официант та, өй җыештыручы да, сатучы да булып эшләп карадым, риэлтор лицензиясен дә алдым. Һөнәрем буенча эшләргә дип тә уйлаган идем. Нәтиҗәдә, программа белән тәэмин итү тестеры һөнәренә тукталдым, Көньяк Американың банклары өчен кушымталар ясый торган компаниягә эшкә урнаштым. Яңа технологияләрне өйрәнү, Латин Америкасы, андагы кешеләр белән эшләү, испан теле бик ошады. Хәзер катнаш чынбарлык күзлекләрен эшләү белән шөгыльләнүче компаниядә эшлим.
Үзем IT тармагында эшләгәнгәдерме, техник эш күп булгангамы, соңгы вакытта иҗатка тартылдым, карантин вакытында рәсем ясый башладым. Facebook сайтындагы «Изоизоляция» төркеменә тап булдым. Проект миңа бик ошады, оригиналь картиналарга охшатып фотосурәтләр ясау идеясен кызларга да тәкъдим иттем. Алар ризалаштылар, нәтиҗәдә татар рәссамнарының картиналарына бик матур һәм үзенчәлекле косплей (кабатлап күрсәтү) килеп чыкты. Киләчәктә дә яңа рәсемнәребез белән сөендерербез дип өметләнәбез.
Туган җиреңнән еракта яшәгәндә, үз милләтеңне, аның гореф-гадәтләрен күбрәк кадерли, якташларың белән берләшә башлыйсың. Кызлар белән шушы еллар эчендә без бик дуслаштык. Күбебезнең әти-әниләре, бертуганнары Россиядә яши, шуңа күрә дә без бер-беребез өчен бик якын кешеләргә әверелдек.
Татарстанга: әти-әниләр йортына Бөгелмәгә, Казанга кайтырга мин бик яратам. Кире кайтырга теләр идемме дигән сорауга, русча әйткәндә «никогда не говори никогда» дип җавап бирер идем. Күп эмигрантлар кебек Америкага күчәргә хыялланмадым, ә менә хәзер монда инде унберенче елымны яшим һәм үз тормышымнан бик канәгать. Бәлки бервакыт кире кайтырмын, ә әлегә мин монда һәм бәхетле.
Роза Харисова, тумышы белән Актаныш районыннан:
– АКШка икенче курсны тәмамлап, 2004 елда Work & Travel программасы буенча эшләргә килдем. 1 ел эчендә инглиз телен әйбәтләп өйрәнергә һәм бераз акча тупларга дигән планым бар иде. Шуңа күрә 4 айдан соң монда калырга уйладым. Аннан соң 1 ел үткәч тә кайтасым килмәде һәм шулай итеп менә инде уналтынчы ел Америкада торам. Беренче вакытларда Нью-Джерси штатында яшәдем. Мине анда мөлаем, ачык йөзле кешеләр шаккатырды. Кая барсам да, барлык кешеләр гел «Hello!» дип әйтеп китәләр иде. Башта мин моңа нык гаҗәпләнгән идем, аннан соң бу гадәтләренә ияләштем кебек. Нью-Джерси штатында 1 ел ярым яшәдем, аннан соң Флоридага күчендем. Беренче елны үзем белән килгән татарлардан башка, бер татарны да очратмадым. Әти-әниләрем белән скайптан, ә дусларым, сыйныфташларым белән «Одноклассники» социаль челтәрендә аралаша идем. Берничә ел үткәч, Сабантуйлар үткәрә башлагач кына, татарлар белән күбрәк аралаша башладым.
Беренче Сабантуй миңа шундый ошады. Нәкъ татар авылындагы кебек татарча җырлы-биюле, уеннар, милли ризыклар, костюмнар белән бик күңелле үткән иде ул. Безнең активистка кызларыбыз Римма Минһаҗева һәм Эльвира Басыйрова җитәкчелегендә шул елдан башлап ел саен март аенда Сабантуй үткәрә башладык.
Нинди генә илдә яшәсәң дә, барыбер үзеңнекеләргә тартыласың, алар белән аралашырга омтыласың. 2015 елдан башлап мин бик күп татар кешеләре белән таныштым, кая барсам да, аларны гел очратып торам. Соңгы сәяхәтемдә Балида утырганда янымда саф татарча сөйләшкән кыз Актаныш районыннан булып чыкты. Үзем дә Актаныштан булгач, минем өчен көтелмәгән шатлык булды ул.
Кияүгә чыккач, ирем белән «кайда яшәргә» дигән сорауны хәл иткәндә, без климатка һәм булачак дусларыбыз татарлар булуына карап, Майами тирәсенә күчәргә уйладык. Анда күченгәч, татар кызлары белән аралаша башладым. Алар белән еш җыелып торабыз, төрле идеяләр уйлап чыгарабыз. Бер-беребез белән нык тыгыз аралашабыз, бәлешләр пешереп, чәкчәкләр ясап кунакка йөрибез, татар гореф-гадәтләрен онытмыйбыз. Безнең кызлар, нинди идея булса да, бик җиңел күтәрелә, милли сәнгать темасын бик ярата. Шуңа төрле проектларны оештыру безнең өчен бик җиңел һәм күңелле.
Ләйсән Сафина
АнонимЭлфизэ, молодец!«Безгә килеп күрегез!»: тавыш бирү этабы башлана (өченче бишлек)
Загрузка ...
